Nuuginnavillutik nuuttartut amerliartorput

Inissaqaratik Københavnimut nutsertartut amerliartorput, taama oqarpoq Agga Petersen, Kalaallit Illuutaanni ornigulluni oqaloqatiginnittartoq.
Allattoq Mads Lynge
decembarip 21-at 2007 08:15

Nuuginnavillutik nuuttartut pillugit ima oqarpoq:

- Nuuttut amerliartuinnavipput, inuusutsikkaluttuinnarlutik, amerlanerillu angutaapput, Agga Petersen oqarpoq, nangipporlu:

- Københavnimi periarfissat nunatsinnut naleqqiullugit allaanerujussuupput. Nuummi inissaqarsimanatik Danmarkiliartartut arlaqarput, periarfissaqarsoralutik maanngartartut. Kisianni takusinnaasarpaat periarfissaqanngitsoq, inissaqanngitsoq aamma suliffissaqanngitsoq, Agga Petersen oqarpoq.

Agga Petersenip aqqusinermi ornillugit sullittagai 25-t missaannik amerlassuseqarput.

Kalaallit Illuutaata Københavnimiittup nutsertut qassiuneri kisitsisaatiginngilai.