Nuugaatsiarmiut Illorsuarmiullu meerartaat atuagaasivinnapput
![Skoletasker til tsunami-børnene](/sites/default/files/styles/image_934x467/public/uummannaq-skoletasker-1.jpg?itok=ZtBDvk88)
- Qanorluunniit pisariaqartitsisunut annikitsumik ikiuilaarneq pitsaasumik kinguneqartarmat uani meeqqat atuartut atuarfimmi aallartilluarnissaat pingaartillutigu atuagaasivimmik, aqerluusaasivimmik, taquaasivimmik imerfimmillu tunineqarput, KNI-p pisortaanera Peter Grønvold Samuelsen oqarpoq.
Nuugaatsiarmiut nunaqarfigisaminnit juunip 17-ani qimagutitinneqarsimasut, aappariit Ulla Samuelsen aamma Nukannguaq Samuelsen, qujamasupput.
- KNI-p meeqqanut atualerniartunut tunissuteqarnera assut qujanarpoq. Uagut Nuugaatsiarmiuuvugut pingasunillu atuartunik qitornaqarluta. Meeqqagut atuagaasivimmik imarisaannillu tunisikkamik assut nuannaartut kiinaatigut takuneqarsinnaapput. Tamannalu qujanarpoq, meeqqattami atuagaasivii Nuugaatsiamiit nassarsinnaasimannginnatsigit, Nukannguaq Samuelsen, KNI naapertorlugu, taama oqarpoq.
KNI tassaarsuarmit eqqugaasunut katillugit 500.000 koruuninik juulip qaammataani aamma tunissuteqareerpoq.