Assit takukkit: Nuugaatsiap matuneqarneraniit ukiut qulingiliuat qaangiummata
Nuugaatsiaq.
Oqaaseq taanna tusaannarlugu eqqarsaat siulliukkajuttartoq tassaavoq tassaarsuaq.
Nunaqarfilli alianartumik pisoqarsimaneranik eqqaamaneqaannanngilaq.
Mikkel Jeremiassenip Nuugaatsiami taamani kommunefogediusup KNR nunaqarfimminut takornariartippaa, taassumalu nunaqarfimmiuuneq nuannersumik eqqaamasarpaa.
- Nunaqqatigisimasallu, aamma uku nunaqarfiit qaninnerit, immitsinnut aliikkusersorusaartarnikuugatta, Mikkel Jeremiassen oqarpoq nangillunilu:
- Upernassakkut maajip aqqarnganni seqineq unnuap qeqqanut alakkartarami illorsuarnut sikumi arsaattarnikuuvugut.
Nuugaatsiaq ungasianiik takuinnarlugu suli inoqartutut misiginarsinnaavoq.
Nunaqarfilli qanilligaanni illut amerlanerit aserfallassimasut takuneqapallassinnaapput.
Mikkel Jeremiassen ilaquttanilu aasat tamaasa ataasiaannaratik Nuugaatsialiartarput, tikinnerillu tamaasa eqqarsaatit qaffakaasarput.
- Manna pinngortitaq eqqaalu alianaatsorujussuupput, avatangiisersua annertoorujussuugami. Nukissanik aallerfigiuaannarpara, kisianni inugisimasai aammalu peerutereernikut ajunaartortannguagullu, taakkua aamma qanitarigatsigit, maanga qallinerit tamaasa soorunami eqqaamasarpakka.
Talittarfimmiit majuaraanni qaleralissunni naamasat siulliit ilagaat, talittarfiummi eqqaaniippoq illu tungujortoq, Mikkel Jeremiassenip oqarnera naapertorlugu taanna qaleralinnik qullukkeriuvoq.
-Una qullukkanik ulikkaartarnikuuarput. Qaleralinnik ulikkaartoq tassaarnikuugami, tipaa naamasinnaassavarsi.
Qummut ingerlaqqilaaraanni Pilersuisup quersua takuneqarsinnaavoq.
Nuugaatsiarmiut umiatsiallit nunaqarfimminnut aasat tamaasa aasarsioriartarput, siornalu ataatsimoorsimapput.
-Una KNI-p pilersuisup ilua sussaanngitsoq nunaqqatigiit igitassarsuit piiariarlugit aaqqissoriarlugu ataatsimuualaartarfittut aaqqissuunnikuuaat, aasaq kingulleq qittaffigivaat.
Illut tungaannut ingerlaarnermi ujaqqat illullu inissisimavii tassaarsuaqareernerata kingorna nikissimasut Mikkelip tikkuartorpai.
Qummut ingerlaqqilaaraanni illup toqqaviani eqqaassutissaq takuneqarsinnaavoq, taannalu ilaqutariit pingasut ajunaarsimasut illuata toqqavigaa.
-Imatut alianartortavia uanga nammineerlunga, aammami inuuneq ingerlaqqittariaqarnikuugami, taanna qaangerniarsarinikuuara. Taamaalillunga massakkut iluatsissimasutut oqaatigisassaavoq, Mikkel Jeremiassen oqarpoq.
Ajunaartut sisamaat illuata toqqavia nunaqarfiup illutungaaniippoq.
Eqqaassutissamiit qummut ingerlaqqilaaraanni illu aappalaartoq takuneqarsinnaavoq, taannalu aamma oqaluttuassartaqarpoq.
-Iluani iluliarujorujussuaqarnikuuvoq, sunaaffa tassaarsuaqarnerani taassuma illup qangatanermini taanna iluliaq nanersimagaa.
Illut sissamut qanittumi toqqaveqarsimasut amerlanersaat qatsinnerusumut nikissimapput.
-Una illu kajortoq, aappaluttoq innga taavalu tungujortoq qaamasoq taakku tamarmik kanani sissamiinnukuupput.
Mikkel Jeremiassenikkut illuat nunaqarfiup qutsinnerumaartaani inissisimammat tassaarsuaqarmat nikisinneqanngilaq.
-Aajuna ilaqutariulluta illorput, taqqamanngaanniit avannaata qimussersuanut piareersarnerit arlalissuit ingerlattarnikuuakka. Aasamut ataasiaannarata alakkartarparput, issaq imarornerani marloriarluta maaneereerpugut.
Ingerlaarnermi pinnguartarfiusimasup atortui takussaapput.
-Juunip aallaqqaataani meeqqat ulluanni pinnguartarfittaarnissartik qilanaarinikuugamikku. Ullummi 14-it sinnilaarpai atagami, aana ilamernga, Mikkel Jeremiassen oqarpoq.
Karrat Kangerluanni qaqqaq sisooreersoq minutsit arfineq pingasut qulingiluallu missaat qaangiummata mallit pukkinnerpaagamik 9,3 meterinik portussusillit Nuugaatsiamut 2017-imi tassaarsuartitsipput.
-Aamannakanneq immap killiffiginikuusaa, Mikkel Jeremiassen tikkuartuivoq.
Tassaarsuaqareerneratalu kingorna ersiorneq pigisimavaat.
-Ersiorneq pisarnikuuvoq. Nuugaatsiameeqqaartaleqqikkatta sunannguaq tamaat soorlu ilulissat aserorpallannerat tupannartarnikuuvoq, kisianni taanna ersiorneq, ilaqutariit uagorpiaat eqqarsaatigaluta, qaangiunnikuuvoq.
Qummut ingerlaqqinnermi iliveqarfik ujaqqanik sinaakkusersorneqarsimasoq takuneqarsinnaavoq.
Tassaarsuaqareernerata kingorna inersimasut pingasut meerarlu ataaseq ajunaarput, angut utoqqasaajuvoq taakku ilagaat sinnerilu ilaqutariit pingasuullutik.
Ajunaarsimasut iliveqarfimmi ataatsimut eqqaassutissaqarput.
Mikkel Jeremiassenip nukaa nunaqarfimmi aamma iliveqarpoq.
-Alianaak tamaanngaanniik aamma isikkivissuaq, Mikkel Jeremiassen iliveqarfimmiit ammukarnermini oqarpoq.
Mikkelip Nuugaatsiap ammaqqinnissaa neriuutigaa.
-Ilaquttakkalu qularnanngitsumik utissaagut, taanna qularnanngilaq. Ilaquttakka aamma uterusuttarput angerlarsertarlutillu, taamaakkami uagut ilaqutariit uteqqinnissatsinnut sapiissuseqarlutalu nukissaqarpugut.
Tassaarsuaqareernerta kingorna Illorsuit tassaarsuaqaqqinnissaanut navianartumi inissisimammat aamma matuneqarpoq.
Mikkelillu taakku nunaqarfiit ammaqqinnissaat neriuutigalugu oqartussanut oqariartuuteqarpoq.
-Pimoorunneruniarsigit taakku nunaqarfiit. Aap, Nuugaatsiaq aseruatiterfiunikuuvoq. Illorsuit taakkua tigussaaneruvoq aammalu ammaqqikkasuarnissaat taanna siulliullugu suliariniarsiuk.
Tassaarsuaqarneraniit aappaagu juunip 17-anni ukiut qulinngussapput, Nuugaatsiarmiullu ulloq taanna nalliussiniarlugu pilersaarutigaat.
-Aappaagu tassaarsuaqarnikuuneraniit ukiut qulinngussapput. Nuugaatsiap facebookkikkut qupperninnguani takuara nunaqqatigisimasatta ilaat piareersaarusulluni suleqatissarsiortoq, Mikkel Jeremiassen oqarpoq nangilunilu:
-Malunnartinniarneqartussaanera maannangaaq eqqartorneqalereernera nuannerpoq, aaqqissuussanut annertunerusunut annikinnerusunulluunniit uanga aamma peqataasarama, ilaquttakkalu peqataanissarput qularnanngilaq.
