Nutsuinermit maligaasat uppernarsineqarput

Nutsuinermit maligaasat avataarsuani angisoorujussuarnit soorlu putut qernertunit ullorissanillu qaarnikunit pilersinneqartarput.

- Ulloriarsiornermi sakkussamik nutaamik nassaarnermut takunnittuuvugut. Nutaamik misigissuseqalerpugut. Avataarsua takusinnaareerlugu maanna tusaasinnaanngorparput, avataarsua pillugu fysikeri Nergis Mavalvala apersorneqarnermi oqarpoq.

Putut qernertut marluk ukiut 1,3 milliardit matuma siorna apormata, apornerat nutsuinermit maligaasanik aallartitsivoq, taamanersuarlili avataarsuani ingerlaalersimapput, Nunarsuartinnullu septembarip 14-iani 2014-imi apuupput, ullorlu taanna ilisimatuut siullerpaamik nutsuinermik maligaasat uuttortaqqaarpaat.

Takunnittut ukiut ingerlanerini paasisat annersaattut taagorpaat, avataarsuullu qanoq pinngorsimaneranik immaqa paasisissinnaassalluta.

Fysikerip tusaamasarsuup Albert Einsteinip ukiut 100-ut matuma siorna nutsuinermit maligaasaqartoq ilimatsaatereerpaa. Aatsaalli maanna uppernarsineqarpoq, nukingalu avataarsuatigut nassataa uuttortarneqarluni.

Einsteinip ilimatsaassinini relativitetsteoriini, tassa suut tamarmik imminnut naleqqiussinnaanerannik eqqarsaatersuutaa, tusaamasaq saqqummiukkamiuk eqqaavaa. Relativitetsteorii ullutsinni ilisimatusarnermut tunngaviusunut ilaavoq.

1915-imili fysikerip Tysklandimeersup maligaasat qaqugumulluunniit uuttorneqarnissaat ilimaginngikkaluarpaa.