VIDEO Nutsugiartartut Narsami naapipput

Kujataani nutsugiartartut Narsami sapaatip akunnerat kingulleq naapipput.

Karl Lynge 20-nik ukioqarluni nutsugiaarsartaarpoq. Efterskolernermini ilinniarsimallugu oqaluttuarpoq:

- Efterskolemiikkatta pattagiaasaateqariarama, taanna ilinniutigivara. Taava aamma Nuummi realskolemi aamma pattagiaasaqarpoq, Karl Lynge KNR-imut oqarpoq.

Nutsugiaasarnermik misilittagartuup nutsugiaasap atornissaa ilisimaarilluarpaa:

- Pattagiaasaq sakkortulaartumik, nikittaqattaartillugit nipaat qiimanartunngorlugu atugassaagami, assigiikajaaginnarmik atorlugu uannuunngilaq, Karl Lynge oqarpoq.

Aaqqissuisut aamma allanik peqataasoqarnissaa pingaartippaat:

- Ukiarmi naapikkatta Qaqortumi nuanneraluartitsiinnarluta, aamma allat peqataaniassammata peqataangitsoornikut, narsami naapeqatigiinnermi aaqqissuisoq Benjamin Kielsen oqarpoq.

Inuusuttut soqutiginnilernissaat anguniakkanut ilaavoq:

- Kingullermik inuusuttoqaaloqaaq Qaqortumi. Aamma maanakkut allassimasuni inuusuttortaqaaloqaat isumalluarnartut, Benjamin Kielsen KNR-imut oqarpoq.

- Qaqortumi amerlatsikkiartortut paasinarpoq. Inuusuttut juullilernerani GU-miikkatta marluk pingasut takkupput. Massakkut tamarmik pattagiartaarsimapput, Karl Lynge oqarpoq.

Misilittagartoorlu isumalluarpoq:

- Inuusuttunut, nangitsisussanut, kinguneqarluarumaartoq isumaqarpunga. 

Tusarnaariat issiavimminni qitaasallattaarput avalallattaarlutillu, ilaqarpulli qilanaaqimaqisunik.

- Qilanaangaarama unnuaq sininngittuungajappunga, taama ittunik takujuinnermik, Hansigne Broberg oqarpoq.

Aaqqissuisorlu Benjamin Kielsen tulluusimarpoq, takullugit nutsugiamik nipilersortartut tusarnaariallu nuannisarujussuartut.

 

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat