Nutserisutsialammut nersornaat ullumi tunniunneqassaaq

Hans Anthon Lynge attortissimaqisoq akissarsisinneqarnini tusaramiuk ima oqarpoq:

- Annerusumik tupaallanneq misigaara, aammalu eqqarsarpunga sooq uangaassava taamatut pineqartoq? Qanoq suliaqartigigama taama pineqarpunga? Immaqa taallami oqartarnerattut: -Suliakka annikikkaluaqaat, annertuppulli ilaat, oqarpoq.

Taanna Hans Anthon Lyngep ullumi tigussavaa. Katuami ullumi nalunaaqutaq sisamanut atuakkiortumit Rasmus Heibergimit oqalugiartussamit tunniunneqassaaq, taanna Statens Kunstråd-ip atuakkialerineq pillugu ataatsimiititaliaani ilaasortaavoq.

Hans Anthon Lynge kalaallisut arlalissuarnik atuakkiaqarpoq danskillu atuakkiaat arlallit aamma kalaallisuunngortissimallugit.

Hans Anthon Lynge "kulturimik atatitsisuuvoq, oqaatsinik ataannartitsisuulluni nutarterisuullunilu, ilami, immini kultureqartuuvoq" Heiberg oqalugiaatissamini taama taavaa.

- Kalaallisut oqaatsit qaqutigoortunngortinnaveersaarpatit ikinnerussutillillu kisimik oqaaserilernissaat pinaveersaartillugu, nutartertuarpatit uummarissuutillugillu. Oqaatsit allat assigalugit kulturimik kinaassuseqalersitsivutit, Hans Anthon Lynge-mut oqalugiaammini ualeru tusarliussassamini ilaatigut taama allappoq.

Ataqqinaatip saniatigut Hans Anthon Lynge 15.000 euronik, qallunaat aningaasanngorlugit 110.000 koruunit missaanniittunik, aamma tunineqassaaq.