Nutserisunngorniarfik: Kalaallisut atuartitsinerit assigiinngippallaaqaat

Nutserisunngorniarnerup ajorneranik tamanna pissuteqanngitsoq, Oqaatsinik Pikkorissarfimmi nutserisunngornianik ilinniartitsisoq Mona Zeeb oqarpoq.

- Ilinniartitsineq ajortutut oqaatigerusunngilarput, soorunami maani ilinniartitsigatta. Tunngaviusumik kalaallisut allannermi ilisimasassat qaqugukkut qanoq oqarpata qanoq oqassanerluta ilinniartitsissutigisarpavut. Eqqarsaatigisarparpulli nunatsinni kalaallisut atuartitsinerup imminut ataqatigiinnginnera, oqarpoq.

Nunatsinni meeqqat atuarfianniit ilinniarfinnut ingerlaqqiffiusunut kalaallit oqaasiinik atuineq ilinniartitsinerlu taama assigiinngitsigitillugu oqaatsitsinnik atuineq pitsanngornavianngitsoq, ilinniartitsisoq oqarpoq.

- Soorlu meeqqat atuarfiat, ilinniarfissuaq imaluunniit ilinniaqqiffiit HTX, GU-t allallu tamarmik immikkut kalaallisut ilinniartitseriaaseqarput. Aalajangersimasunik malitassaqannginnatta tamatta assigiinngitsumik atuartitsivugut, taamaammat atuartut ilinniartullu naammasisartut piginnaasaat assigiinngitsorujussuusinnaasarput, Mona Zeeb nangippoq.

Nutserisut suliaasa kukkuneqartarnerat piffissaaleqinermik aamma pissuteqartarnerarpaa.

- Nutserisoq allannerpaalunnik, quppernerpaalunnik imaluunniit spaltialunnik nutseriniaruni piffissaq sivikitsuarannguaq atorlugu - soorunami inernissaa pitsaavallaarnavianngilaq. Piffissaq apeqqutaaqataasorisarparput, nassuiaavoq.

Naqitani oqaaseqatigiiliat kukkunillit nutserisunngorniat ilinniarneranni iluaqutaasumik sammineqartarput.

- Maluginiartarparput tusagassiuutitigut oqaatsit atorneqartut allatallu nutsernerlutat ilinniartuutitsinnut sungiusaatigitittarpagut. Nutsernerlutartaat kukkunersiortittarlugit. Atorluartorujussuusarparput nutsernerlutat sungiussaatigitissallugit.

Oqaatsinik Pikkorissarfimmi ilinniartitsisoq Mona Zeeb aamma oqarpoq, nutserisunngorniat nutserisullu ataatsimoorfissaminnik amigaateqartut. Taamaammat nittartakkakkut oqaatsit atorneqakkajuttut allattorsimaffiannik nutserinermillu suliaqartut oqallittarfiannik pilersitsinissaq siunnersuutigaa, politikkikkullu tamanna aalajangiiffigisariaqartoq oqaatigalugu.