Nutellap neqeroorutaanera Frankrigimi pisiniarfissuarni uivissutigineqartoq

Nutellalu Frankrigimi ima mamarineqartigaaq allaat pisiniarfissuit ilaanni ussanneqartarluni. Frankrigimimi pisiniarfissuaatillit Intermarchékkut Nutellamik neqeroorutitsialaqarsimapput inuit nuannaarutigeqisaannik.

Nutellaguttorpassuusimapput, allaammi siulliuniuttoqarluni, ilaatigut sakkortuuliortoqarluni. Ajattaattut, nujaartuuttullu imaaginnavissimapput. Nutella glasi ataaseq Intermarchémi nalinginnaasumik 4,5 Euronik, tassa 33,5 koruunit missaannik akeqartarpoq, pisiniarfissuarli neqerooruteqarsimavoq, Nutella glasi ataaseq 1,41 Euroqalersillugu, tassa 10,5 koruunit missaannik akeqartilersimallugu.

Politiit pisiniarfinnut arlalinnut aggersarneqartariaqarsimapput, eqqissisaajartartoriaqarsimallutik:

- Uumasutut pissusilersorsimapput. Arnaq ataaseq nujaartorneqarpoq, arnaq utoqqaq niaqqumigut niaqqumigut anaaneqarpoq, arnalu alla assaa ikilerneqarluni, pisiniat ilaat takunnittoq oqaluttuartoq, tuluit nutaarsiassaqartitsiviata BBC-p allaaseraa.

Pisiniarfissuit ilaanni sulisup nutaarsiassaqartitsivimmut Le Progrés-mut oqaatigaa eqqissisaaniaraluarnertik iluatsissimanngitsoq:

- Inuit avissaartinniaraluarpavut, ajattartiinnarpugulli, sulisoq oqarpoq.

Pisiniarfiup Nutellaatai minutsit 15-iinnaat ingerlaneranni nungussimapput.