Pituffik: Nutarterisarsimanerit USA-p ukiumut nalunaarusiaani atuarneqarsinnaapput

Nunanut allanut ministereqarfimmi allagaatinik paasitinneqarsinnaatitaanikkut USA-mi ukiumoortumik nalunaarusiat 2014-imili Pituffimmi "mission upgrades" eqqartortarsimagaat atuarneqarsinnaavoq.

Piffissalli taassuma iluani Naalagaaffeqatigiit USA-mik ataatsimeeqateqarnissat nalunaarusianik eqqartuiffiusussaagaluit taamaatiinnartarsimavaat.

Pituffimmi killiffik pillugu USA ukiut tamaasa nalunaarusiannguamik Kalaallit Nunaannut Danmarkimullu nassiussisarpoq.
Nalunaarusiap ilaatigut imarisarpai sakkutooqarfimmi suliat ingerlasut suliassanullu pilersaarusiat.

Nalunaarusiani ukiuni pingasuni kingullerni USA-mit suliarineqarsimasuni atuarneqarsinnaavoq pilersaarusiaq taaguutilik "mission upgrades" - imaappoq Pituffimmi atortunik pitsanngorsaaneq. Ukiumoortumik nalunaarusiami KNR-ip allagaatinik paasitinneqarsinnaatitaaneq atorlugu Københavnimi nunanut allanut tunngasunut ministereqarfimmi misissorsimasaani tamanna atuarneqarsinnaavoq.

AAMMA ATUARUK Ministereqarfik radareqarfik pillugu ilisimatinneqareersoq

Atortunik pitsanngorsaaneq qanoq ingerlassanersoq itisilerneqarsimanngilaq. Amerikamili tusagassiuutit ilaasa siorna maajimi allaaseraa USA  koruunit milliardit kuartiisa naliginut Pituffimmi radarimik nutarteriniartoq.

Naallu "mission upgrades" sunik imaqarnersoq ilisimaneqanngikkaluartoq naliginnaasumik nutarterisoqarsimanavianngitsoq, Københavnip Universitetiani sakkutooqarnermi immikkut ilisimasallip Kristian Søby Kristensenip nalilerpaa.

-  "Mission upgrades" uani pitsanngorsaanertut paaserusuppara. Allanngortitserujussuarnerunersoq, annertuumilluunniit sivisuumik pitsanngorsaanerunersoq oqaatigiuminaappoq. Isumaqarpungali  "mission upgrades" sakkutooqarfiup suliaanut tunngasuusoq, nutaanillu soorlu anartarfilersuinerunani.

Nunanut allanut tunngasunut naalakkersuisup Suka K. Frederiksenip nassuerutigisimavaa  ukiumoortumik nalunaarusiani oqaatsit taakku atorneqartut qanoq imaqartinneqarnersut Namminersorlutik Oqartussani eqqarsaatigisimannginnamikkit, Pituffimmimi sullissinissamik isumaqatigiissut annaasaq ukkatarineqarsimammat.

Danmarkimili nunanut allanut tunngasunut ministereqarfimmi ilisimaneqarpoq 2016-imi nalunaarusiami radarimut ivertinneqarsimasoq pineqartoq.  

Naalagaaffeqatigiilli siusinnerujussuakkut suliamut tunngasut paasisimasinnaagaluarpaat.

AAMMA ATUARUK  

Aviisip AG-ip sapaatip akunnerata siuliani oqaluttuaraa Kalaallit Nunaata Danmarkillu 2015-imili ukiumoortumik marloriarluni ataatsimiittarnerit

- Permanent Committee aamma Joint Committee -  sullissinissamik isumaqatigiissutissap isumaqatigiinniutigineqarneri pissutigerpiarlugit taamaatiinnartarsimagaat.

Pituffimmi ukiumoortumik nalunaarusiat naliginnaasumik Permanent Committeemi eqqartorneqartussatut naleqqulluinnaraluarput.

Nunanut allanut tunngasunut allaffeqarfiup Nuummiittup ministereqarfiullu Københavimiittup maanna periarfissaq siulleq atorlugu Permanent Committeemi ataatsimeeqqittalerniarlutik nalunaarput. Join  Committeemili suna peqqutiginerlugu ataatsimeeqataanniannginnertik Danmarkip Kalaallit Nunaataluunniit oqaatigerusunngilaat.

AAMMA ATUARUK Pituffimmi radari nutarsarneqartoq

AAMMA ATUARUK USA-p nunatsinni suliai ernumalersitsipput

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat