- Paragrafit atuuttut tamarmik malinnissaat soorunami qulakkiissavarput. Tamanna pisussaaffigaarput, taamaaliussaagullu. Tamanna qularnanngilaq, nutaarsiassaqartitsinermut pisortaq oqarpoq.

Nutaarsiassaqartitsiviup pisortaa aningaasanik taperneqarneq inerteqqutaasinnaasoq pillugu: Siunissamut ilinniutigissavarput

KNR-ip angalanermit, USA-mit tapiissuteqarfigineqartumit radiomut tv-mullu ilanngutassiornini inatsisinik unioqqutitsissutigisimagunarpaa. Angalaneq pillugu suliap ilisimanninnerulersissavaatigut, nutaarsiassaqartitsiviup pisortaa oqarpoq.

KNR-ip nunatsinni radiomut tv-mullu suliaqarnermut avataaniit tapiissuteqartoqarnerani malittarisassat siunissami malissavai.

Tamanna KNR-ip nutaarsiassaqartitsiviani pisortap, Mikkel Bjarnø Lundip, aalajangersumik oqaatigaa.

Taanna inatsisilerisuut KNR-ip USA-mut angalanermit radiokkut tv-kkullu aallakaatitsinermini inatsisit unioqqutissimagunarai pingasunngornermi naliliiffigereeraallu oqaaseqarpoq. USA-mut angalaneq amerikamiut nunanut allanut tunngasunut ministereqarfianit tapiissuteqarfigineqarpoq.

- Paragrafit atuuttut tamarmik malinnissaat soorunami qulakkiissavarput. Tamanna pisussaaffigaarput, taamaaliussaagullu. Tamanna qularnanngilaq, nutaarsiassaqartitsinermut pisortaq oqarpoq, nangillunilu:

AAMMA ATUARUK Namminersorlutik Oqartussat: KNR USA-mut angalanermini tapiissuteqarfigineqarnermini inatsimmik unioqqutitsivoq

 - Tamatuma ilinniarfiginissaa qulakkiissavarput. Suliarisatta kiffaanngissuteqarfigilluarnissaat qulakkeerparput – tamannali naammanngilaq. Soorunami tamanna akisussaaffigaarput taamalu pisoqaqqissanngilaq.

Kiffaanngissuseqarnermut immikkoortoq:


Aallakaatitassiani takisuulianilu tamani USA-mut angalaneq USA-mit tapiissutigineqartoq KNR-imit ima oqaasertalerlugu ilisimatitsissutigineqarpoq:
 

  • "KNR-ip amerikamiut nunarput pillugu qanoq eqqarsaateqarnersut paasiniarlugu USA tikeraarpaa. Periarfissat suuppat nunatsinnullu qanoq periarfissiippat? USA-mut angalaneq amerikamiut nunanut allanut ministereqarfianit akilerneqarpoq, ministereqarfiup nunat allat nutaarsiassaqarfiisa USA pillugu nutaarsiassaqarneranni tapiissuteqarfiginiarlugit neqeroorutiginikuuaa. Amerikamiut nunanut allanut ministereqarfiata tusarfigisagut qanoq apersorneqarnissaat qanorlu allaaserinnissanersugut sunniuteqarfiginngilaat"

Tigusiffik: KNR

USA-p angalanermit aallakaatitassiarineqartunut sunniuteqanngilluinnarnissaa KNR-ip angalannginnermini qulakkeeqqaarpaa. Amerikamiullu tungaanniit piumasaqaataasoq ataasiinnaavoq, tassa angalanermit KNR-imit saqqummertoqarnissaa – sunali pillugu qanorlu annertutigisumik piumasaqartoqarani.

KNR: Qulakkeerilluaqqaartalissaagut

Aningaasaliisoqarneranut suliaq kalaallip, nammineq allanik tunuliaqutaqarani saqqummiisartup, Qarsoq Høegh-Damip qaqillugu, USA-mit tapersiisoqarnera Facebookikkut isornartorsiorpaa.

KNR-ip isornartorsiuisoqarnera tunngavigalugu suliaq Ilinniartitaanermut, Kultureqarnermut Ilageeqarnermullu Naalakkersuisoqarfiup inatsisilerinermik immikkoortortaqarfianit naliliiffigeqquaa. Naliliinerannilu KNR-ip angalanermit aallakaatitassiat radiokkut tv-kkullu saqqummersikkamigit inatsit unioqqutinneqarsimagunartoq oqaatigineqarpoq. Taamaakkaluartorli takisuuliat nittartakkakkut saqqummersinneqarnerat ajornartortaqanngitsoq erseqqissaatigineqarluni, taakkumi inatsimmi ilaanngillat.

AAMMA ATUARUK USA-p mittarfiit pingasut misissorai: Februaarimi aalajangerataannaavugut

Mikkel Bjarnø Lund suliami matumani KNR-imit kukkusoqartoqarsimasorineraa aperineqarami ima akissuteqarpoq:

- Kukkusimasugut oqaatigineqarsinnaavoq, inatsisilerituummi naliliinerat naapertorlugu inatsimmi paragrafit tamarmik malissimagunanngilagut. Kisianni akuliuffigineqanngilluinnarluta kiffaanngissuseqarnissarput qulakkeersimallutigu oqaatigissallugu pingaaruteqartippara.

- Maanna paragrafinik atuuttunik tamanik malinnittuaannalernissatsinnik qulakkeeriniarluta misissuissaagut.

Nutaarsiassaqartitsinermik pisortap oqarnera naapertorlugu KNR-ip ilanngutassiat aallakaatitallu suliarineqarsimasut qanoq iliuuseqarfiginissaat maanna aalajangiiffigissavai.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat