Nutaarsiassaqartitsinermut pisortap KNR-imut eqqartuussisulersuussinera
Radioaviisimi qanittukkut oqaluttuaraarput Kalaallit Nunaata Radioani nutaarsiassaqartitsinermik pisortaasimasup, Najattaaq Mathiassenip, soraarsitaasimanera tunngavissaqanngitsoq.
Nunatta eqqartuussisuunerata Søren Søndergård Hansenip nassuiaataani tamanna atuarneqarsinnaavoq.
Inatsisilerinermut tunngatillugu nassuiaat tassaavoq eqqartuussiviup pisimasoq pillugu qanoq inerniliiumaarnera.
KNR-imi siulersuisut aalajangerput nassuiaat eqqartuussutinngortinneqassasoq. KNR-ip pisortaa Lars Lennert-Sandgreen taama oqarpoq.
Nassuiaat eqqartuussutinngortinneqarpat, suliaq KNR-imit suliareqqitassanngortinneqarsinnaavoq. Kalaallit Nunaata Radioata pisortaa Lars Lennert-Sandgreen oqarpoq suliap suliareqqitassanngortinnissaa suli aalajangiutivinneqarsimanngitsoq.
Najattaaq Mathiassenimik soraarsitsineq inatsisitigut tunngavissaqanngitsoq, nunatta eqqartuussivianit aalajangerneqarpoq.
Taamatut aalajangiisoqarnerup saniatigut aalajangiunneqarportaaq Najattaaq Mathiassen 125.000 koruuninik taarsiiffigineqassasoq, eqqartuussinermilu aningaasartuutaasimasut KNR-imit akilerneqassasut.
