NUTAARSIASSAQ KINGULLEQ: Isikkamik arsaalluni pissartanngorniunnerit ataasinngorpamiit aallakaatinneqalissapput
Tamatuma nalunaarutigineqarnerata kingorna Nuup, Odense-p, Bruxellesip Geneve-llu akornanni oqarasuaatit imaaginnavissumik sianeqattaarput, ualigaalu kingusissukkut paasinarsivoq pissartanngorniunnerit aallakaatinneqarsinnaanngortut – kisianni aatsaat ataasinngorpamiit.
KNR-imi aallakaatitassiornermi pisortaq, Niels Pavia Lynge, ualigaa naliliisipparput.
Isikkamik arsaalluni Europami pissartanngorniunnerit Kalaallit Nunaat tamakkerlugu sapaatip akunnerini tulliuttuni aallakaatinneqassappat?
-Neriuutigaarput, ataasinngorpaminngaaniit kisianni aatsaat. Nassuiaatissartaa unaavoq, aallakaatitsiveqarfitsinni ittuusoq TV2-minngaaniit ullaaq nalunaarfigineqarpoq, pilersaarutaareersutuut TV2-miit februaarimi marsimilu nalunaarutaareersutuut, aallakaatitsinissamut pilersaarusiarineqarsimasut Europaminngaaniit pissartanngorniunnissamut aallakaatitsinissamut pilersaarutit aallakaatissinnaajunnaarsimagivut - tassa piginnittooqqaarnissamut tunngassuteqartut apeqqutaatillugit aallakaatitsisinnaanerput ajornarsisimasoq ullaaq nalunaarutigineqarsimasoq oqaatigineqarpoq, Niels Pavia Lynge oqarpoq.
Taanna aperaarput akunnerup naanerani unamminissat, ammaanersiorneq unamminerillu allat sisamat takusinnaassannginnerivut, akivorlu:
-Tassa unamminerit sisamat takutissinnaanngilavut, kisianni neriuutigaarput unamminerit sinneri 27-t aallakaatissinnaassallutigik, taannali aatsaat qulakkiivillugu ataasinngorpat paasisinnaassavarput, taakkua piginnittooqqaarnissamut akisussaasut, tyskit/schweitzimiut rettighedsfirmaataat SportFive-mik atilik isumaqatigiissusiorfigineqareerpat, Niels pavia Lynge oqarpoq.
Naggataagullu aperineqarpoq kikkut pissartanngornissaat ilimagineraa, akivorlu nammineq tamanna ilisimavinngikkaluarlugu tusatsiarlugu Kroatiaasinnaasoq.