Nutaarsiassanik nittartagaq ullumi atuutilersinneqartoq
Tassanilu nutaarsiassanik aammalu aviisip Qeqqap Nunatsinni inuit pisullu pillugit nammineq allaaserisai atuarneqarsinnaapput.
Atuagassiamik greenland todayimik aammalu aviisimik Nuup Qeqqanik saqqummersitsisareersoq Aviaq Mørch nittartagaliornissamut isumassarsisuuvoq.
- Nuup Qeqqata internettikkut saqqummertalernissaa eqqarsaatigineqaqqaaraluarpoq. Maannali taanna taagorparput Qeqqa, Nunatta qitianiittutut paasillugu. Taamaalilluta Kalaallit Nunaanni kikkut tamaasa peqataatissinnaalerpagut.
- Illoqarfimmiikkutta, nunaqarfimmiikkutta, Danmarkimiikkutta Tunumiikkuttaluunniit tamanna kateriffigisinnaasarput pisariaqartipparput, Aviaq Mørch taama oqarpoq.
Torersumik oqallittoqarnissa qulakkeerusukkaat
Aamma qeqqa.gl-ip ileqqorissaartumik torinngitsumillu allaffiunani oqalliffiunissaa neriuutigaa.
- Oqallittoqartillugu torinngitsumik oqaluttoqakulavoq, Aviaq Mørch taama isumaqarpoq.
- Tamanna Qeqqa.gl-ip allanngortikkusuppaa, taamaammallu torinngitsumik ilanngussisut piiarneqartassapput. Taamaalilluta neriuppugut amerlanerusut oqaaseqarulissasut isummersoqatigiillutillu.
- Kalaallit Nunaanni iluarsisariallit amerlaqaat, suulli tamarmik nuanniillutillu alianartuunngillat, nittartakkami aaqqissuisoq taama naggasiivoq.