Nutaarmiut kommunefogedeqanngillat

Nunatsinni nunaqarfiit pingajorarterutaat kommunefogedeqanngillat, nunaqarfiit 16-it pineqarlutik. Taakkulu ilagaat Nutaarmiut.

Nunaqarfiit Nutaarmiut, Tasiusaq Kullorsuullu siulersuisuisa siulittaasuat Simon Sakariassen oqaluttuarpoq Nutaarmiuni kommunefogedeqanngisaannartoq, nunaqarfimmilu kommunefogedeqarnissamut inuttaaliinissamut allagartaliisoqanngisaannarsimasoq.

- Aamma Tasiusaq aamma 2010-miilli kommunefogedeeruppoq, Simon Sakariassen, Tasiusamiit, KNR-imut erseqqissaavoq.

Nunaqarfiup siulersuisuisa siulittaasuat oqaluttuarpoq nunaqqataasunut ataasiaratik kommunefogedinngoqqusillutik kajumissaarisarsimagaluarlutik.

- Nunaqqataasut ilaasa atorfik pilerigisaraluarpaat, qanorli aningaasarsiaqarnissartik paasigaangamikku tunuaannartarput, Simon Sakariassen oqarpoq.

Nunaqarfiit 100-it inorlugit inuttallit kommunefoged ukiumut 6.500 koruuninik aningaasarsiaqartarput qaamammut 540 koruuninik aningaasarsiaqartarlutik. Nunaqarfiillu 600 –it sinnerlugit inuttallit ukiumut 45.000 koruuninik aningaasarsiaqartarput qaammammut 3.700 koruuninik aningaasarsiaqartarlutik.