Nutaarmiut: Ilaqutariit iluanni pisuunnguatsiarpoq

Nunatsinni politimestereqarfik ullaarmanna nalunaarfigineqarpoq, nunaqarfimmi Nutaarmiuni Upernaviup avanaaniittumi inuit pingasut toqutaasimasut allallu marluk anertuumik ikiligaasimasut.

Politiinit nalunaarutigineqartut kingulliit malillugit, annertuumik ikiligaasut marluk Upernaviup napparsimavianut tikiunneqartut, inuunerminik navianartorsiorput aappaatalu ikiligaanerminik aniguisinnaanissaa ilimagineqanngilaq. Upernaviup napparsimmavianiit Nuummi Dronning Ingridip napparsimmavissuanut maanna apuunneqareerput.

- Ikiligaasup aappaa napparsimavimmut pissunneqartoq ajoqusersimanerminit  aniguisinnaagunanngitsoq nakorsanit nalilerneqarsimavoq, politimestereqarfimmi allaffimmi pisortaq Claus Risberg KNR-imut oqarpoq.

Ikiligaasup aappaa inuunerminik ulorianartorsiorpoq, taakkuuppullu paasissutissat politiit maannamut tunniussinnaasaat.

Politiinit maannamut qulakkeerlugit paasisagut tassaapput, toqutsisoqarnerani saassussisoqarneranilu aallaasersortoqarsimanngitsoq.

- Saassussinermi toqutsisoqarneranilu suna imaluunnit suut atorneqarsimanersut maannakkut oqaatigisinnaanngilarput, pinerluttoqarsimatillugu paasiniaanerit ingerlanneqarnerat pissutigalugu, Claus Risbjerg radioaviisimut oqarpoq.

Toqutsisimasutut pasineqartoq suli killisiorneqanngilaq.

- Pasineqartoq suli killisiorneqanngimmat, toqutsisoqarnerani pisut pillugit nassuiaatissaqartoqanngikkallarpoq, politimestereqarfimmi allaffimmi pisortaq Claus Risbjerg oqarpoq.

KNR-imit paasisat malillugit toqutaasut pingasut ikiligaasorlu ataaseq ilaqutariipput, tamannali politiinit uppernarsarneqarusunngilaq, politiit paasiniaanerat suli ingerlanneqarmat.

Nunaqarfimmi Nutaarmiuni innuttaasut tupaqqapput, pisorlu assut tupigineqarluni.

- Tupinnaqaaq tupannaqaaq uanni. Nunaqarfimmi taama inukitsigisumi taamatut ilimasugani kalerrinneqarluni tupannarpoq, soorunami nunaqqatigiiusugut tamatta tupassimaqaagut, misiginneqataaqalutalu, Markus Eliassen KNR-imut oqarpoq.

Nunatta naatsorsueqqissaartarfiata kisitsisaataat malillugit, Nutaarmiut Upernaviup avannaani 91 kilometerisut avannarpisitsigisumiittoq 46-nik inoqarpoq.

Tusagassiorfiit nittartagaanni ullumi ullup ingerlanerani allaaserineqartut malillugit, toqunneqartut aallaaneqarlutik toqunneqarsimasut allaaserineqarpoq, kisianni tamanna ilumuunngitsoq politiinit maanna qulakkeerlugu oqaatigineqarpoq.

- Politiit toqutsiffiusumut pineranni qulakkeerlugu paasineqarpoq, allaasit atorneqarsimanngitsut. Toqutsisoqarnerani ikiligaasoqarneranilu suut atorneqarsimanersut politiinit maannakkut oqaatigisinnaanngilarput, pinerluttoqarsimaneranik misissuineq suli ingerlanneqarmat, naatsorsuutigaarpulli kingusinnerusukkut tamanna pillugu nalunaaruteqartoqarumaartoq, Claus Risbjerg oqarpoq.

Toqutsisimasutut pasineqarneqarluni tigusarineqartoq,  angut 20-nik ukiulik qulimiguulimmik Upernaviliaanneqarpoq, sulilu killisiorneqarsimannngimmat, toqutsinermut pissutaasoq politiinit ilisimaneqanngilaq.

- Anguti 20-nik ukiulik pasineqarluni tigusarineqarnini pillugu nassuiaateqanngilaq. Aammalu susoqarsimanera pillugu uagutsinnut nassuiaateqanngilaq,  politimestereqarfimmi allaffimmi pisortaq Claus Risbejrg radioaviisimut taamatut oqarpoq.

Toqutaasut kikkuuneri politiinit suli nalunaarutigineqanngilaq.