Nutaarmiuni toqutsisutut pasisaq Danmarkiliartinneqartoq

Angut 22-nik ukiulik, Nutaarmiuni inunnnik pingasunik toqutsisutut pasisaasoq, maanna Danmarkiliartinneqarsimalerpoq, eqqartuussivimmut sassartinneqartussanik tarnikkut misissuisarfimmi Risskovimiittumi misissorneqassalluni.

- Pasisaasup Nutaarmiuni pisoqarnerani tarnikkut pissusia misissorneqartariqarpoq. Tassalu pasisaasoq eqqartuussivimmi pisuutinneqassappat, taanna qanoq pillarneqassanersoq, misissuinerup tunngavilissavaa, Qaasuitsumi Politiit pisortaat, Niels Erik Nymark Jensen, oqarpoq.

Tassalu angut 22-nik ukiulik ilumut pillarneqarsinnaassanersoq, imaluunniit katsorsarneqarlunilu inissinneqassanersoq inissinneqaannassanersorluunniit tarnip nakorsaasa qallunaat inassutigissaneraat apeqqutaavoq.

Aamma Upernaviup Eqartuussiviata poorskilersoq akueraa, pasisaasup tigummigallagaanera maajip aallaqqaataata tungaanut sivitsorneqassasoq.

Tassami tarngata pissussaanik misissuinerup saniatigut apeqqutit amerlasuut politiinit suli akissutissarsineqanngillat.

Pinerluffimmi teknikikkut misissuisartut misissuinerminnit nalunaarusiamik suli nassiussinngillat, ammalu toqutaasut timaannik misissuinernit inernerit suli pissarsiarineqaratik.

Taakkualu takkutsinnagit, 22-nik ukiulimmik annattumilluunniit 81-inik ukiulimmik apersueqqinnissaq uatseerneqarallarpoq.

- Pasisaassup inaarutaasumik apersorneqarnissaa utaqqissuteqqaarniarparput, pinerluffiusumi qanorpiaq pisoqarsimaneranik ilisimasaqalernissatsinnut. Aatsaallu pinerluffiusumi teknikkikkut misissuinernit nalunaarusiat pissarsiarereerutsigit, qanoq pisoqarsimasinnaaneranik ilimasuuteqalersinnaavugut, Qaasuitsumi Politiit pisortaat, Niels Erik Nymark Jensen, oqarpoq.

Oqarsinnaavugut, toqutsinerit amerlasuut, misissuinerillu amerlasuut naammassineqartariarput. Aamma pineqartup pinerluffiusumi qanoq pisimanera paasiniarneqartariaqarpoq, oqaannartariaqarpungalu, tamanna sivisusinnaavoq, Niels Erik Nymark Jensen oqarpoq.