Nutaarmiuni toqutsisoq suli misissorpaat

Angutip 22-nik ukiullip Nutaarmiuni toqutsisutut pasisap tigummigallarneqarnera ullumimut killeqartinneqartoq, Eqqartuussivimmit sapaatip-akunnerinik sisamanik maanna sivitsorneqaqqippoq. Qaasuitsumi politiit pisortaat Erik Rasmussen taama nalunaarpoq.
Allattoq Oline I. Olsen
maajip 01-at 2012 10:41

- Tassa Risskovimi tarnikkut misissorneqarnera suli naammassineqanngimmat, tigummigallagaanera sivitsorneqaqqippoq, Qaasuitsumi politiit pisortaat, Erik Rasmussen, oqarpoq nassuiaallunilu tarnikkut misissuinerit sivisussusaat nalileruminaatsut.

- Tarnikkut misissuineq qaammammik ataatsimik imaluunniit qaammatinik pingasunik sivisussuseqassanersoq oqaatigisinnaanngilara, Erik Rasmussen oqarpoq.

Angut 22-nik ukiulik, Danmarkimi Risskovimut nuutsinneqartoq, tassanilu tarnikkut misissorneqassasoq, apriilip qulingani Radioaviisimit saqqummiunneqarpoq.

- Pasisap Nutaarmiuni pisoqarnerani tarnikkut pissusia misissorneqassaaq. Misissuinerullu inernerata aalajangissavaa, pasisaasoq pisuutinneqassaguni qanoq pineqaatissinneqassanersoq, Qaasuitsumi Politiit taamani pisortarisaat, Niels Erik Nymark Jensen, angutip 22-nik ukiullip Danmarkimi Risskovimut tarnikkut misissorneqalerneranut atatillugu taama nassuiaavoq.

Tassalu angut 22-nik ukiulik ilumut pineqaatissinneqarsinnaanersoq, imaluunniit katsorsarneqarlunilu inissinneqassanersoq inissinneqaannassanersorluunniit, Risskovimi tarnit nakorsaasa inassutigissaneraat apeqqutaalerpoq.