Nutaarmiuni pisoq pillugu eqqartuussineq kiisami aallartilerpoq
Nunatta Politeeqarfianit unnerluutiginnittoq, Helle Lykke Olsen taama nalunaaruteqarpoq.
Upernaviup avannaani nunaqarfimmi Nutaarmiuni pisoq alianaqisoq pivoq, siorna februuarip arfineq pingajuanni.
Angutip inuusuttup taamani 22-inik ukioqartup, persuttaanermini toquppai, arnat marluk aappaa 75-inik ukiulik aappaalu 31-inik ukiulik. Aamma toqutaanut ilaavoq niviarsiaraq arfineq pingasunik ukiulik.
Angutip inuusuttup pileriarisimasani nassuerutigereerpai aamma sianissusaa misissorneqareerluni. Tassalu maanna unnerluunneqarnissa piffissanngortoq unnerluussisunit oqaatigineqarpoq.
- Pisoq pillugu misissuilluareerlunga aalajangerpara, angummut inuusuttumut unnerluussinerit tassaasut, pingasunik toqutsisimanera aamma inuunik sisamanik toqutseriarsimanera pillugit eqqartuunneqarnissaa maanna aalartittariaqartoq, unnerluussisoq Helle Lykke Olsen tusagassiutinut nalunaarummini allappoq.
Taassuma ilanngullugu nalunaarutigaa, piumasariniarlugu angut inuusuttoq ukiuni aalajangigaanngitsuni parnaarussivimmi Herstedvesterimiisinneqassasoq.
- Taama siunniussaqarnistsinnut pissutaapput, pinerliinerup sakkortussusaa aamma nakorsat misissuinerisa inerneri, Helle Lykke Olsen allappoq.
Nutaarmiuni pisoq qaammatip 13-nit matuma siorna pivoq. Unnerluussinerup aatsaat maanna pilersaarutigineqalerneranut pissutaavoq, unnerluussinermi allakkiaq aatsaat maanna naammassineqarmat, taama oqarpoq politiit unnerluussisuunerat, Morten Nielsen.
- Aatsaat unnerluussissutit allagaasa naammassineqarnerannut pissutaaneruvoq, pinerlineqartut qanoq annertutigisumik taarsiiffigineqarnissaannik ikiuinerput sivisuumik ingerlanneqarsimammat. Nalunaarutigisinnaavaralu taarsiiffigineqartussat piumasarimmassuk aningaasat katillugit 1. million koruunit tungaanut amerlassuseqarmata, Morten Nielsen oqarpoq.
Pinerliisup nammineerluni aningaasat akilertussaassavai, taamaaliorsinnaanngippalli naalagaaffik akiliisinneqassaaq, Morten Nielsen radioaviisimut oqarpoq.
Eqqartuussineq Qaasuitsup Eqqartuussiviani Ilulissaniittumi ingerlanneqassaaq. Unnerluussisunit ilimagineqarpoq eqqartuussineq ullut pingasut qaangiuppat aallartissinnaassasoq.
