Nutaarmiuni ilisipput
Nutaarmiut oqaluffianni inissakilliorneq pissutaalluni ilisinermi nunaqarfiup atuarfiani naalagiartoqarpoq.
- Naak ilisineq aliasuffiugaluaqisoq eqqissisimasumik pivoq, Tasiusap ajoqia Thomas Nielsen Svendsen ilisineq pillugu taama oqaluttuarpoq.
Ajoqip oqaluttuarnera naapertorlugu ilaqutaasut amerlanerit ilisinermi peqataasimapput.
Ilisinerup nalaani misiginneqatigissutsit nunatsinnit tamaneersut atuarneqarput, ilisinerlu naammassereermat atuarfimmi kaffisuunnermik naggaserneqarluni.
Nutaarmiuni toqutaasut ilineqartut tassaapput aanaajusoq 75-inik ukiulik anaanaasoq 31-nik ukiulik kiisalu 31-nik ukiullip pania 8-nik ukiulik.
Aataajusup qanorinnera ullumi ualigaa suli tusagaqarfiginngilarput. Angut 81-inik ukiulik Rigshospitalimi pilanneqareerpoq, anersaartuuserlugulu suli sinitsitarineqarallarluni. Nuummi napparsimmavissuarmi nakorsaanerup Carsten Thordalip oqaaseqarnera naapertorlugu angutip 81-inik ukiullip sapaatip-akunnerit marluk matuma siorna toqoriarneqarmat timikkut aqqunartitersimaneri anigussagai naatsorsuutigineqarpoq.
