Nutaanik maleruagassiornikkut sullivinni avatangiisit nukittorsarneqarput
Pinerluttulerinermi inatsit tunngavigalugu akisussaatitaaneq aamma ukiup nikinnerani allanngortinneqarpoq, sulisitsisunut inatsisip malinnissaanik pisinnaasartik tamaat iliuuseqarsimasunut ajornannginnerulissaaq, sulisunullu mianersuaalliorsimasunut ajortoornerup kingorna taarsiivigineqarnissamut tunngatillugu ajornartorsiuteqarnerulissalluni.
–Maleruagassat nutaat Kalaallit Nunaanni sullivinni avatangiisitigut suliniuteqarnerup nukittorsarneqarnissaanik siunertaqarput, saaffiginiakkat ajutoornaveersaartitsinerulernissaat naatsorsuutigineqarmat, taamalu sulinermi ajutoornernik nungullarsaanernillu ikilisitseqataassallutik, Ivalo Egede, Kalaallit Nunaanni Suliffigissaanermut Siunnersuisoqatigiinni siuliuttaasoq, oqarpoq.
Aamma sanaartornerup iluani ataqatigiissaarisutut ilinniartitaaneq nutaaq eqqunneqassaaq. Suliffeqarfinni sanaartornermik suliaqarfiusuni sulisitsisut ataatsimit amerlanerugaangata, tamanna siunissami suliffeqarfimmi ataqatigiissaarisoqarnissaanik kinguneqassaaq. Tamannalu sullivimmi avatangiisinik aamma nukittorsaajumaarpoq.
- Maleruagassat nutaat kingunerissavaat, sanaartorfinni tamani sulisitsisut ataatsimit amerlanerugaangata, sulisut isumannaatsuunissaannik peqqissutsikkullu ajoqusinnginnissaannik isumaginninnissamut piginnaasalimmik sulisoqarnissaa. Tamanna sanaartornerup iluani sullivinni avatangiisit pillugit suliaqarnermik ersarissumik nukittorsaataavoq, Ivalo Egede oqarpoq.
