Nutaanik illuliortiterneq sarfaarukkaluartarnernik kinguneqaqattaartoq
Unnuaq sarfaaruttoorneq akunnerit arlaqartut sivisussuseqarpoq. Qujanartumik najugaqartut unnukkut suli eqqumaneranni sarfaaruttoorneq pivoq. Unnukkut kikkut tamarmik sinittut sarfaarunneq pisimasuuppat, qerititsiviit sarfaaruttut nerisassat soorlu neqit aattoornerannik kinguneqarsimasinnaagaluarpoq.
- Sivikitsumik nal. 17.30 sarfaaruttooraluarpoq, kisianni taava kingusiinnaa ajoraluartumik sivisunerusumik arfineq marlut qeqqata eqqaani sarfaarulluni. Sukkanerpaamik teknikkerit aggertippagut, paasivaallu taakani eqqaani kabelit ajoqquteqartut. Taakku kabelit ajoqquteqarnerisigut inigineqartut sivikitsumik sarfaaruttoortarsimanerannut pissutaasimasinnaalluarpoq, taama Nukissiorfiit attaveqaqatigiinnermut pilersaarusiortartuat Anja Rosa Quist oqarpoq.
Nukissiorfiit nammineerlutik kabilit taakkua assallugit ikkussuussimanngilaat, Sulorami illorsuit sanaartorneqarnerini iliorarneqarnikuupput. Massakkullu aaliangertoqarsimavoq kabilit taakkua ajoqquteqarnersut misissuiffigineqassasut, suliarlu taanna piffissaq sivikitsoq atorlugu naammassineqarsinnaanngilaq.
-Sarfaaruttoornermi immikkut sarfaliuut taakunga nassiunnikuuarput, ineqartut eqqorneqartut nalunnginniassammassuk sarfalersorneqarnertik ataavartumik isumannaarneqartoq. Allatut periuseqassagutta naleqqunnavianngilaq. Utaqqiisaanik kabilit misissorneqassapput, ajoqqutaasullu iluarsartuunneqassapput, taama Anja Rosa Quist knr.gl-imut naqissusiivoq.