Nutaanik atisaliortoqassanngilaq
Aningaasanut inatsisissatut siunnersuut, siullermeerutaasumik akuerineqartoq, allanngortinneqanngippat, Great Greenland nutaanik atisaliorsinaanngilaq tunitsivissanillu nutaanik ujarlersinnaanani, naalakkersuisunut inatsisartunilu ilaasortanut paasissutissiinermi Great Greenlandimit aaqqissuunneqartumi, tamanna oqariartuutigineqarpoq.
Allattoq Else Løvstrøm
oktobarip 13-at 2009 14:44
Periarfissat assigiinngitsut kingunerisinnaasai pillugit Great Greenlandimit paasissutissiineq politikerinik eqqarsalersitsisimanersoq, Inatsisissaq aappassaanik oqallisigineqalerpat paasinarsissaaq.
-Politikkikkut aalajangiinissamut akuliunnianngilagut, aalajangiinerulli kingunerisinnaasai pillugit paasitinniarpavut, Henrik Estrup oqarpoq.
Ameerniarnermi tapiissutit annertussussaat inatsisissap aappassaaneerlugu oqallisigineqannginnerani taamaasiorusussimavoq.
- Ammit akii tapiissutaannaapput, ullutsinni ukiullu tulliani annerulernavianngitsutut isikkoqarallarpoq, Henrik Estrup oqarpoq.
