Nutaanik akitsuusiisoqarnissaa Jeremiassenip pinngitsoortippaa
Sanaartornermi maskiinat ukiumoortumik 20.000 koruuninik qamuteralaallu ukiumoortumik 900 koruuninik akitsuusernissaat pillugu inatsisissatut siunnersuut aningaasaqarnermut naalakkersuisup taamaatiinnartariaqarpaa. Siunnersuutip inuiaqatigiinni Siumumilu akerlerineqarnera taamaatitsinermut pissutaavoq.
Motoorillit akitsuusersuiffigineqarnissaat Vittup taamaatiinnarpaa
Inatsisissatut siunnersuut Qaasuitsup Kommuniani Demokraatinit Siumullu iluani inatsisartunut ilaasortamit Kristian Jeremiassenimit akerlilerneqarsimavoq.
- Isumaqarpunga Naalakkersuisut naalaarsimasut. Akitsuusiinissaq akerleralugu akitsuutinullu akuersiniarnaga arlaleriarlunga oqaatigisarpara. Akuerseqataanngikkuma Naalakkersuisut ikinnerussuteqassapput. Qineqqusaarnerup nalaani akitsuusiinissaq akerleralugu partiitsinni arlarleriarluta oqaatigisaratsigu itigartitserusuppunga, Kristian Jeremiassen taama oqarpoq Naalakkersuisullu siunnersuummik taamaatitsinerannut nersualaarlugit.
- Naalakkersuisut akitsuutinik taamaatsinerat isumatusaarnerusoraara. Taamaasilluta inuiaqatigiit eqqorneqarnissaat pinngitsoortipparput.
Siunnersuuteqartulli Vittus Qujaukitsup Siumumi avissaartuuttoqannginnera erseqqissarpaa.
Naalakkersuisut inatsisissatut siunnersuummik taamaatitsinissaannut tatineqarnerat sanngiinnermik takutitsinngilaq. Paarlattuanik nukittuujunermik takutitsivoq. Siumut partiiuvoq oqallinnermut inissaqartitsilluartoq, aamma siunnersuutinik inatsisartut ataatsimiinnissaannut nassiussisoqareernerani, Vittus Qujaukitsoq oqarpoq.
Siunnersuut 8 aamma 10 millionit akornanni iluanaarutaasussatut naatsorsuutigineqaraluarpoq, aningaasallu taakku allatigut pissarsiariniarneqartussanngussapput.
- Kikkut tamarmik piumasaat naammassisinnaanngilagut. Inuiaqatigiit piumasaat tamaasa naammassiuaannarsinnaanngilagut, aningaasaqarnermut nunamullu namminermut naalakkersuisoq oqarpoq.
Ilulissani sanaartornermik suliffeqarfimmi Sannassisumi pisortaq, Knud Andersen, Naalakkersuisut aalajangersimanerat pillugu Radioaviisimit ippassaq paasiniaaffigigatsigu nuannaarpoq.
- Sanaartortunut tamanut, innuttaasunullu tamanut, nutaarsiassaavoq nuannersupilussuaq, taama oqarpoq.