Nutaamik toqoraavittaassaaq

Savanik toqoraaneq septembarip qeqqaniik aallartissooq. Narsami toqoraavik aserfallassimavoq qanganitserlunilu, nutaamillu sanasoqarnissaa suli ilimanaateqarani. Naalakkersuisut arlaleriarlutik neriorsuisimapput Savanik toqoraavimmik sanasoqassasoq, neriorsuutertillu kinguarsartuarpaat.

Kommuneqarfik Kujallermi borgmester Simon Simonsenip naammagittarnera killeqalersimavoq. Taamaammat tallimanngormat ammasumik Naalakkersuisunut allagaqarpoq, apeqqutigalugu qanoq sivisutigisumik Kommune Kujalleq utaqqissasoq.

- Eqqarsaatigaarput aappaagu nersutinik toqoraanissaq. Nutaavimmik toqoraaviliussagaanni sivikinnerpaamik ukioq ataaseq sananeqartussaavoq. Taamaattumik maannakkut iliuuseqartariaqarpugut aappaagu toqoraanissaq angumerissagutsigu. Tamannaana nalunaarutinni maluginiaqqugiga, Simon Simonsen oqarpoq.

Taanna naapertorlugu Nunalerinermut Naalakkersuisoq Ane Hansen maajip qaammataa ilimasaarisimavoq juulimi nalunaaruteqassalluni, taamanili suli aalajangertoqarsimanngitsoq ilisimatitsissutigaa. Maannali tassa aalajangernissamut siunnersuut piareerpoq taannalu sapaatip akunnera tulleq saqqummiunneqarumaartoq, Ane Hansen KNR-imut oqaluttuarpoq.

- Aalajangiiffigisassatut siunnersuutissaqarpunga Naalakkersuisut tullianik ataatsimiilerunik isummerfigisassaannik. Taanna akuerineqarpat kujataani toqoraaviliornissamik suliaq aallartissaaq, Ane Hansen oqarpoq.

Taamaammat borgmesteri isumakuluuteqartariaqanngitsoq taanna isumaqarpoq. Uumasunik toqoraavissatut pilersaarusiaq aappaagu savanik toqoraasoqarnissaanut piareersimassammat.

- Naatsorsuutigaarput toqoraavik nutaaq aappaagu piareersimassasoq, Ane Hansen oqarpoq.

- Fra næste år regner vi med, at man er klar med det nye slagteri, siger Ane Hansen.