Nutaamik periusiliornikkut suliat kukkuneqartarunnaassasut
Nalunaarusiami siorna nakkutilliisussaatitaasup erseqqissaatigisaani meeqqat inuusuttullu ikiortariallit kommunimit "sumiginnarneqarsimasut" pillugit suliat kukkussutillit amigaatillillu ikilisarniarneqarput.
- Misissuiffigisimavarput meeqqat ilaqutariillu pisariaqartitaat qanoq ililluta aaqqissuusseqqinnikkut isumagisinnaanerlugit, Kommuneqarfik Sermersuumi meeqqanut inuusuttunullu ingerlatsivimmi pisortaq Martha Lund Olsen oqarpoq.
AAMMA ATUARUK Sermersuumi meeqqat pisortanit sumiginnagaapput
Suliat assigiimmik suliarineqartalerniartut
Taamaattumik ilinniartitsisut, perorsaasut, politiit peqqinnissaqarfimmiullu sisamanngornermi katuami paasissutissiilluni ataatsimeeqatigineqarput; qanoq ilillutik, meeqqat inuusuttullu atornerlunneqarpata, sumiginnarneqarpataluunniit qisuariassanersut.
Kommuneqarfik Sermersuumut saaffiginninniaraanni tamarmik oqarasuaammut e-mailimulluunniit ataasiinnarmut saaffiginnittalissapput.
Taamaaliornerup qulakkeeqatigitissavaa suliat tamarmik assigiimmik sukkasuumillu kommunimi tamarmi suliarineqartarnerat.
- Akunnerit 24-it ingerlaneranni isummerfigineqassaaq suliaq nukinginnartuunersoq, imaluunniit paasissutissanik allanik pissarseqqaarluni suliassaanersoq. Inatsisit malillugit qaammatit marluk iluanni misissuinissamut iliuusissarsiornissamullu periarfissaassasoq, Martha Lund Olsen oqarpoq.
Suliat 900-t kukkuneqarlutillu amigaateqartut
Nakkutilliisussaatitaasup isornartorsiuerujussuarnerata kingorna kommunip Kommuneqarfik Sermersuumi suliat ammasut tamaasa misissornissaannut Deloitte sulisussarsiaraa.
AAMMA ATUARUK Meeqqat inuusuttullu pillugit suliat 900-t kukkuneqanngikkunik amigaateqartut
Misissuinerup taassuma takutippaa meeqqat inuusuttullu pillugit suliat 75 procentii kukkuneqarlutillu amingaateqartut.
Tamannali maanna kommunip påskip kingorna nutaaliorluni pinaveersaartinnialerpaa.
- Isumaginninnerup tungaatigut misissuinerup kingorna suliap taamatut ingerlaasissaa qulakkeerniarparput. Tassa taakkuupput siunissami sammisassagut, Kommuneqarfik Sermersuumi meeqqanut inuusuttunullu ingerlatsivimmi pisortaq Martha Lund Olsen oqarpoq.
