Nutaamik isumaqatigiinniarnissamik isuma Kuupiup ammaffigaa
- Uanga eqqumiiginngilara, isumaqatigiissutit pitsanngoriaatissaat tikkuartorneqalermata, oqaatigissavarali, nutaamik isumaqatigiinniarneq aqagu piunnanngimmat, Kuupik Kleist oqarpoq.
Namminersornermut Inatsisip pilersikkiartuaarneqarnerani suleqataasup aammalu ataatsimiititaliarsuarmi siulittaasuusup, Jakob Janussenip Inuit Ataqatigiit siunnersuutaat ima oqaaseqarfigaa:
- Namminersornermut tunngaviusut ataasiakkaat apeqqusersorneri imminornertut isigineqarsinnaavoq!
Jakob Janussenip Inatsisip iluani ataasiakkaaginnaat eqqarsaatiginngilai. Taassuma oqaatigaa, Namminersornermut Inatsit naliginnaanngitsutut Inuit Ataqatigiit siusinnerusukkut oqaatigisarsimagaluarlugu maanna allannguiniarnerat Inuit Ataqatigiit isummaannik allannguinerusoq.
Qallunaat Folketingimut ilaasortat ullumi radioaviisimut oqaasii, Jakob Janussenip isumaqatigai, oqarluni inatsit isumaqatigiinniussutaalerpat tamakkerlugu isumaqatigiinniutaassasoq, ilaannai pinnagit:
- Tapiissutit ataatsimoortut, akissaatit aamma akit allanngoriartorneri tunngavigalugit allanngortinneqartarnerat pillugu isumaqatigiinniartoqalissagaluarpat, Namminersornermut Inatsit tamarluinnaat isumaqatigiinniassutaalissagaluarpoq, Jakob Janussen taama oqarpoq, nangillunilu taassuma oqaatigaa, ataasiakkaaginnannguit isumaqatigiinniutaalissappata, Nunatta pitsaasumik isigineqarnera innarlerneqassagaluartoq. Nangillunilu Jakob Janussenip oqaatigaa, Dansk Folkepartiip Nunarput pillugu oqaaseqartartua, Søren Espersen isumaqatigalugu, taanna oqarmat Nunatta aningaasatigut isertitaasa isumaqatigiinniutaalernissaat avaqqunneqarsinnaassanngitsoq:
- Inatsisip ilaannaa isumaqatigiinniussutaalissasoq kissaatigineqarpat, taava uuliasiornermi aatsitassarsiornermilu isertitarineqarsinnaasut oqaluuserineqaqqittariaqalissagaluarput, Jakob Janussen oqarpoq.
Inuit Ataqatigiit siulittaasuat, Kuupik Kleist toqqissisaallunilusooq ima oqarpoq.
- Nutaamik isumaqatigiinniarneq aqagu piunnanngilaq! Inuit Ataqatigiit siulittaasuat, Kuupik Kleist taama oqarpoq.
Namminersornermut Inatsit allanngortinniarneqassagaluarpat tamanna imaannaanngitsuussaaq. Siullermik Folketingimi isumaqataasut amerlanerussuteqartussaassapput, aappassaanik Inatsisartuni aamma amerlanerusut isumaqataasussaassapput, aatsaallu tamatuma kingorna isumaqatigiinniarnerit aallartissagaluarlutik.
