Alaska: Nutaamik inatsisiliornikkut nunami eqqissisimatitami uuliasiorneq ammaanneqalersoq
Akileraartarnermik aaqqissuusseqqinnissamut inatsisissatut siunnersuut Amerikamiut senatianni sapaatit akunnerata naanerani, arfininngormat, akuersissutigineqarpoq.
Akileraartarnermik aaqqissuusseqqinnissaq uissuumminartortaqarpoq, Alaskammi ilaani nunarujussuarmi Arctic National Wildlife Refugemi sumiiffinni arlalinni uuliasiorluni gassisiorlunilu qillerinissamut akuersinissaq pillugu siunnersuummik nutaamik piffissap kingulleq atorlugu ilaneqarmat.
Nunarujussuaq Alaskap avannaata-kangianiittoq Danmarkimit marloriaammik angineruvoq.
Uumasorpassuaqarfiuvoq qillerisoqarnissaalu maannamut inerteqqutaalluni.
AAMMA ATUARUK Alaska nunami eqqissisimatitami uuliasiortitsinialersaartoq
Nunarujussuaq uuliamik gassimillu pinngortitameersumik aamma pisuussuterpassuaqarfiusoq atorluarneqariaqartoq præsident Trumpip arlaleriarluni oqaatigisarpaa. Maannamulli iluatsitsisimanngilaq.
Akileraartarnerli pillugu inatsisissatut siunnersuutip paragraffinik allanik ilaneratigut qillerisoqarnissaanut akuersisoqarsinnaanera periarfissaalerpoq.
Akileraartarneq pillugu inatsisissatut siunnersuut suli inaarutaasumik inatsisinngortinneqanngilaq tamatumali sapaatit akunnerini tullerni pinissaa naatsorsuutigineqarpoq.
