Nusukap atorluarneqanngitsunik 760-inik suliffissaqarsoraa

Avaleraasartuunik pisassanik tunniussinermi nunatsinninngaanneersut nutaat salliutillugit pisassanik tunniussineq. Avataasiorluni qaleralinniarnermut pisassiissutinik 1500 tonsinik tunniussineq. Inuusuttunut inuussutissarsiutitigut efterskolenik pilersitsineq. A/S Inissiaatileqatigiiffiup INI-p inissiaataanik nutarterineq. Sanaartornerit annikinnerusut.

Tamakku suliniuteqarfiginerisigut sulisitsisut peqatigiiffiata Nusukap suliffinnik 760-it missaannik pilersitsoqarsinnaanissaa ilimagaa.

Avaleraasartuunik pisassanik tunniussinermi nunatsinninngaanneersut nutaat salliutillugit pisassanik tunniussinermi suliffissat nutaat 500-t pilersinneqarsinnaanissaart peqatigiiffiup ilimagaa. Taakkununngalu piumasaqaatigineqassaaq sapinngisamik najukkami aalisartunik amerlanerpaanik atuissasut.

- Nunami tunitsiviit suleqatigalugit avalaasiorluni qaleralinniarnermut 1500 tonsinik pisassiissuteqarnikkut, nunani aalisariutinilu suliffissat 50-it pilersinneqarsinnaappuit, siulittaasoq Gerth Lynge allappoq.

Aammattaaq Naalakkersuisut inuussutissarsiutitigut efterskolenik pilersitsisuuppata inuusuttut 70-it missaat aallartinneqarsinnaanissaat ilimagaa. Efterskolellu taakkua sanaartorneqarnissaat Gerth Lynge 35-40 millionit koruuninik akeqassasoq naatsorsimavaa.

INI inissianik nutarterinermut 50 millionit koruuninik tunineqassaaq. Tamanna suliffissaaleqisut 60-it suliffissannik pilersitsisinnaavoq.

Naggasiutigalugulu siunnersuutigaa nuna tamakkerlugu annikitsumik sanaartornerit nuna tamakkerlugu agguataarlugit aallartisarneqassasut, taamaaliornikkut suliffiit 80-it missaat pilersinneqarsinnaassammata.

Tusagassiorfinnut nalunaarutini ima kaammattuuteqarluni naggaserpaa:

- Ataatsimoorneq suleqatigiinneq kisiat aqqutissaraarput pissutsinik allannguiniarutta. Ataatsimoorluta ingerlasa nunatta siunissaa pitsaanerpaaq anguniarlugu.