NUSUKA: TNI naalisarneqartariaqarpoq

Nunaqavissut Suliffiutillit Kattuffiat, NuSuKa, isumaqarpoq Tunngaviusumik Niuernermik Ilinniartitaanerup, TNI-p, ilusaa allanngortittariaqartoq.

Tunngaviusumik niuernermik ilinniarfik sivisuallaarsorineqarpoq.

- Ukiut sisamat ingerlanerini ukiup aappaata qeqqa ilinniartut suliffeqarfinni sulisinneqartarput. Tamanna sivisuallaarujussuartutut nalilerparput, Ole Aggo Markussen oqarpoq.

Tunngaviusumik Niuernermik Ilinniartitaanermi allaffimmiunngortoqarsinnaallunilu niuertussanngorniartoqarsinnaavoq, ukiunilu sisamani ilinniartoqartarluni.

Ilinniarnerup ingerlanerani sapaatit akunnerini 130-ni suliffimmik misileraasoqartarpoq, sapaatillu akunnerini 77-ini atuagarsortoqartarluni.

Atuagarsorneq sapaatit akunnerinik marlunnik naalisarneqarniarpoq, suliffimmillu misileraasarneq naalisangaatsiarneqarusulluni. NuSuKa-p siunnersuutigaa sapaatit akunnerit 130-ninngaanniit 20-nut naalisarneqassasoq.

NuSuKa-llu pisortaa ima tunngavilersuivoq:

- Inuusuttut ukiuni sisamani tunngaviusumik ilumut ilinniassanersut uani pineqarpoq. Imaluunniit ukiut sisamat ilinniassappata annertunerusumik piginnaasanik pissarsisinnaassannginnersut.

Assersuutigalugu nunani allani ukiut sisamat universitetini bachelorinngorniarnermut atorneqartarput, nunatsinnilu ukiut sisamat tunngaviusumik ilinniartitaanermut atorneqartarlutik. Taamaattuminguna oqartugut ukiuni tunngaviusumik ilinniartitaaneq sivisuallaartoq, NuSuKa-p pisortaa oqarpoq.

Inuusuttut piffissaajarusunnagit taama siunnersuuteqartoqarpoq:

- Isumaqarpugut tamanna piviusorsiornerujusoq. Inuusuttut kingusinnerusukkut allamik ilinniariartoqqissinnaanerat eqqarsaatigalugu taamaattumik aaqqissorneqarsinnaanera orniginartinneruarput, NuSuKa-p pisortaa, Ole Aggo Markussen oqarpoq.