NUSUKA sunniuteqaqataarusuppoq

NUSUKA-p ilaanngunneratigut kattuffiit pingasut Aalisarnermut Siunnersuisooqatigiinni ilaasortaalerput. Gerth B. Lynge, NUSUKA-mi siulittaasuusoq, sunniuteqaqataalernissamut qilanaarpoq.
apriilip 29-at 2008 10:26

Naalakkersuisut sisamanngormat apriilip ulluisa 24-anni aalajangerpaat NUSUKA Aalisarnermut Siunnersuisooqatigiinni ilaasortaatitaqalissasoq.

Royal Greenland, Polar Seafood GA-lu aalisarnermut Siunnersuisoqatigiinni suleqatigilernissaat qilanaarigitsik, Gerth B. Lynge oqarpoq.

- Siornaalli ataatsimeersuarnermi immami inuussutissarsiortut ilaasortanngorsinnaanerat ammaakkatsigit, siunnersuisoqatigiinni ilaasortaarusulersimavugut, Gerth Lynge oqarpoq.

- Uagut nunatsinnut sullisserusuttuuvugut, nunatsinni iluaqutissaq annerpaaq angorusunnerpaasarparput. Aqqutit tamaasa akuuffigaagut, taamaattumik anguniakkat sakkortunerusumik anguniarsinnaassavagut, Gerth Lynge oqarpoq.

NUSUKA-p ilaasortai tassaapput tunitsiviit, aalisartullu sinerissami qanittumi aalisartut avataasiorlutillu aalisartut. NUSUKA manna suliffeqarfinnik 80-inik ilaasortaqarpoq, katillugit 80-it missaannik immikkoortortalinnik.