NUSUKA: Suliarinnittussarsiuussinermi nunaqavissut salliutinneqartalerlik
Suliffeqarfiit nunatsinni angerlarsimaffillit suliarinnittussarsiuussisoqarnerani salliutinneqartariaqartut, Nunatsinni Suliffiutillit Kattuffiat NUSUKA isumaqarpoq. Taakku nunaqavissut salliutinneqartalernissaat anguniaqqullugu naalakkersuisunut inassuteqarlutik allagaqarput.
-Suleqatigiisitamik pilersitseqqusivugut, suliffeqarfiit nunatsinni angerlarsimaffeqartut, nunatsinni pigineqartut, nunatsinnilu inunnik nalunaarsorsimasunik pigineqartut aningaasatigut nukittorsarneqarnissaat anguniarlugu. Taamaalilluta alliartornissaannut pitsaasumik toqqissisimanartumillu aqqutissiuunniarlugit, NUSUKA-mi siulittaasoq Gerth B. Lynge oqarpoq.
Ukiuni kingullerni tallimani Naatsorsueqqissaartarfimmit nalunaarsuinerit takutippaat sanaartornerup iluani unammillerneq sakkortungaarmat avataaninngaaneersunullu unammillersinnaaneq ajornarmat suliffeqarfiit nutaat 60 procentii uniinnartartut.
Isumassarsiaq Nunavuminngaaniit isumassarsiaavoq, tassanilu ilinniartitseqqiinermi, suliffeqarfiillu aningaasatigut patajaallisarneqarnissaat anguniarneqarpoq. Suliffeqarfik nunatsinni angerlarsimaffeqaruni 7 procentimik akisunerugaluarluni suliassanik tigusisinnaavoq, nunatsinnilu nunaqavissumik pigineqaruni 14 procentimik akisunerugaluarluni tigusisinnaavoq, illoqarfinnillu allanit 7 procentimik akisunerugaluarlutik suliassamik aamma tigusisinnaassallutik. Taamaalillutik nunanit allanit suliffeqarfinnut naleqqiullutik 21 procentimik akisunerugaluarlutik suliassat tigusinnaassavaat. Taamaaliornikkut Nunavumi aningaasat kaaviiaartinneqartut amerlisarneqarsinnaapput.
-Nunavumi aningaasat kaaviiartut amerlisarnissaat, ilinniartitsinerillu amerlisarnissaat siunertaralugu taamaaliorput. Uagut aamma taamatut takorluuivugut. Suliarinnittussarsiuussinermi allanngortiterilaarluni nunatsinni suliffeqarfiit pigineqartut salliutinneqarnissaat suliassaqartuaannarniassaallu anguneqarsinnaavoq. Taakkumi ilinniartitserusunnermik peqarput, taamaattumillu aningaasaqarnikkut nukittorsarneqarnissaat taamaalilluta aamma takutissinnaassavarput, Gerth B. Lynge oqarpoq.
NUSUKA-p naalakkersuisunut inassuteqaataa Ineqarnermut Angallannermullu naalakkersuisoq aqqutigalugu nassiunneqarpoq. NUSUKA-mit siunnersuutigineqarpoq suleqatigiit NUSUKA-mit, Kalaallit Nunaanni Sulisitsisut Peqatigiiffianit GA-mit, ILIK-mit Namminersornerullutik Oqartussanit KANUKOKA-miillu inuttalerneqassasoq, taakkulu siunnersuutiginiarneqartoq suliarissagaat.
