- Pisortat aningaasaleeqataaffigisaannik sanaartortoqartillugu pinngitsoorani ilinniartoqarnissamut piumasaqaateqartarnissaq atuutsinneqartariaqarpoq. Nunatsinni sulisitsisut peqatigiiffianni NUSUKA-mi siulittaasoq Gerth Lynge taama isumaqarpoq. Taamaalillunilu, Inatsisartuni ilaasortap Siumumeersup Ruth Heilmannip pinngitsoorani praktikkertoqartalernissamut piumasaqaateqalernissaanik siunnersuutaanut, Inatsisartuni ullumi oqaluuserineqartussamut NUSUKA tapersersuivoq. Gerth Lynge ima oqarpoq:
- NUSUKA-miit oqariartuutigisaqaattaartarnmikuuarput, pisortat , kommunet Namminersornerullutillu Oqartussat aningaasaleeqataaffigisaannik sanaartorneqarpat, ilinniartoqarnissamut piumasaqaaat atuuttariaqartoq.
Gerth Lynge oqarpoq suliffeqarfiit minnerusut nunatsinnilu angerlarsimaffillit ilinniartoqarusunerusartut.
- Kisianni ajornartorsiutigisarpaat suliassat eqqarsaatigalugit, ilaannikkut qaammat ataaserluunniit siumut isigisinnaasannginnamikkut. Taamaattumik taakkua salliutikkutsigit ilinniartut amerlanerpaat ilinniarfissaqarnissaat qulakkiissavarput.
Nuummi ukiuni makkunani snaartorfissuarmi killoq praktikkerfissaaleqineq ajornartorsiutaanerarpaa.
- Sanaartorneq sukkasoorujussuarmik ingerlavoq, taamaakkaluartorlu ilinniartiqarnissamut piffissaqannginneq utoqqatsissutigineqartarluni. Ilimmarfissarsualiorneq isiginnaaraanni, tassani ilinniartoqarput, taamaattumik taanna akueriuminaatsorujussuuvoq, pisortat aningaasaliiffigissaanni ilinniartoqarnissamut inissaqartitsinngimmata.
Sinerissamissaaq praktikkerfissaaleqisarneq ajornartorsiutaajartortoq Gerth Lynge oqarpoq.
- 10-40-50-i atorlugu sanaartorneq assut ulapititsisarpoq, tassanilu ilinniarsimasunik amigaateqarneq utoqqatsissutigalugu, avataaniit aallertuarpugut, taakkualu oqartarlutik: ”una suliassaq naammassiinnariarlugu aallaqqittussaapput.” Pissutsit taamaattut pissanngillat suliffeqarfiit nunatsinniittut salliutikkutsigit, taakkuummata ilinniartoqarusuttartut.