NUSUKA-p ajornartorsiornera siulittaasup miserratiginngilaa

- Ilaasortagut ikiortariaqalertillugit ikiorsinnaavagut, Nukusami siulittaasoq Gerth B. Lynge oqarpoq. Taassuma tupaallaatigaa NUSUKA-p allaffiani pisortaasimasup NUSUKA 20-t missaannaanik ilaasortaqartoq ippassaq unnukkut radioaviseqarnitsinni oqaatigimmagu.

- Nassuerutigissavarput piffissami kingullermi annertoorujussuarmik aalisarnermut tunngasut sammineqarnikuummata. NUSUKA-mi ilaasortatsinnut tunngatillugu apeqqutit pisortanut aaqqiagiinngissutit assigiingitsut annikitsuunerusut ilaasortatta sullittarnerini sammisarsimavagut, Gerth B. Lynge nassuiaavoq.

NUSUKA-p siulittaasua Gerth B. Lynge ingerlaqqittariaqarnertik pillugu taama oqarpoq.

NUSUKA-mi pisortaasimasoq Ole Aggo Markussen ippassaq oqarpoq kattuffik ilaasortaanermik akiliuteqartunik 20-iinnarnik ilaasortaqalersimanermigut ingerlaqqinnissaa qularnartoq.

Gerth B. Lynge feerialinnginnermini isumaqaraluarpoq ilaasortatik 45-sut.

- Ukiup naanerani 100-t missaanniittut ilaasortaanermut akiliuteqarnikuusut sooq unerarsimanera uanga suliassaraara. Neriuppungalu ilimagalugulu NUSUKA piffissami qanittumi nukittuunngoqqissasoq, siulittaasoq oqarpoq.

Siulersuisut juulip naanerani ataatsimiinnerminni isumaqatigiillutik anguniaqquaaat kattuffiup nakussassarnissaa. Ilaasortaminnillu suli tapersersorluarneqarlutik oqaatigaa.

Gerth B. Lynge siulittaasuujutigaluni allaffissornermik siunissami ingerlatsissaaq.

- Uanga qulaajarniartussaavara, suliffiutillit 100-t 1.500 koruuninik akiliinikut sooq ikileriarujussuarsimanersut. Qanilaarnerusumik ilaasortat ilaasortakullu attaveqarfigilerukkit ilimagaara uteraqqilissasut, siulittaasoq oqarpoq.

Isumaqarpoq NUSUKA GA-lu kattuttariaqanngitsut. Imalu kattukkaluaraanni aporfiusinnaasut eqqaavai:

- Ernumaginarnerpaasutut isigaara suliffeqarfiit mikinerusut akunnannerusut tusarneqanngitsoornissaat. GA-mi aamma ilaasortaagamik suliffeqarfiit angisoorujussuit, ilai nunatta avataanit pigineqartut, NUSUKA-mi siulittaasoq Gerth B. Lynge erseqqissaavoq.