NUSUKA: Nukissiorfiit pillugit akinissamut periarfissaqartariaqarpugut

Nunaqavissut Suliffiutillit Kattuffiata NUSUKA-p Nukissiorfiit siunissaat pillugu Inuussutissarsiornermut Pisortaqarfiup tusarniaanera isornartoqartippaa.

Tusarniaaneq qallunaatuinnaq allanneqarsimavoq ullualunnguaannarnillu akinissamut piffissaliisoqarsimalluni. NUSUKA-p siulittaasua Gerth B. Lynge oqarpoq, Nukissiorfiit ilaatigut piginneqatigiiffinngornissaanut apeqqummut ilaasortamik tusarniaaffiginissaat pisariaqarmat Inuussutissarsiornermut Pisortaqarfimmut ammasunik allagaqarlutik:

- Isummerfiginagu ingerlaannaq una qisuariarfigisimavarput Nukissiorfiit siunissami A/S-nngornissaanut siunnersuutit tusarniaaffigineqarmata, tassalu inuiaqatigiit pigisaata Nukissiorfiit siunissami qanoq ingerlanissaat pingaarutilerujussuuvoq, kisiannili una 20-ani tusarniaaneq takkuppoq 22-anilu akisassaalluni. Qallunaatuinnarlu takkulluni, Gerth B. Lynge nassuiaavoq.

NUSUKA-p tusarniaarnermut ulluni pingasuinnarnik piffissaliilluni akinissaq naammaginngilaat.

Pingaartippaat ilaasortamik tusarniaanermi akuutinnissaat.

- Uagut siulersuisut imaluunniit ulluinnarni aqutsisut isummerusunneq ajoratta. Tusarniaanerit tamaasa ilaasortatsinnut ingerlatittaratsigit taamaattumik periarfissaqartittarpagut sapaatip-akunneranik, nangippoq.

NUSUKA-mi allattoqarfik aalajangerpoq tusarniaaneq akinngikkarniarlugu.

- Qallunaatuinnaq takkuttut, taamalu sivikitsigisumik periarfissiineq naammaginnginnatsigu, Gerth B. Lynge erseqqissaavoq.

- Naammagittaalliuterput suli akineqannginnami. Takulaariarlugu ualimut isummissaagut qanoq alloriaqqissanerluta. Kisianni neriuppugut Naalakkersuisut paasillugu tuarniaanerup akinissaanut killigititaq kinguartissagaat, oqarpoq.

Neriuppullu qaammatip naangajalerneranulluunniit kinguartinneqarsinnaassasoq.

- Nukissiiorfiit uagut inuiaqatigiit pigigatsigu qanoq alloriaqqinnissaanut sunniuteqarusuppugut. Taannartaa assut pingaartipparput.

Gerth B. Lynge taama oqarpoq. Nukissiorfiit pillugit tusarniaaneq pillugu Inuussutissarsiornermut Pisortaqarfimminngaanniit oqaaseqartitsiniaraluaratta suli iluatsinnilarput.