NUSUKA naalakkersuisumit taperserneqarpoq

Sulisitsisut peqatigiiffiata NUSUKA-p sulisussarsiuussisoqarnerani nunaqavissut salliutinneqartalernissaanik siunnersuuteqarnerat, Ineqarnermut angallannermullu naalakkersuisumit Jørgen Wæver Johansen-imit taperserneqarpoq.

-Isumaqarpunga siunnersuut assut soqutiginartuusoq malersoqqinneqartariaqartorlu. Pisortaqarfimmi sulisukka qinnuiginikuuakka, pineqartut suliamullu soqutigisaqarsinnaasut ataatsimeeqatigissagaat, arlaatigut nunatsinnut tulluartumik periusissamik nassaarniarnissaannik ujarlerniassammata. Siunnersuut soqutiginarpoq. Qanorluunniit mumikkaluarutsigu, tamatta sulissutigisariaqarparput nunatsinni inuussutissarsiornikkut inerisaaneq imminut annertusiartungaartutut ittoq pilersissallugu. Soorlu namminersorneq pillugu ataatsimiititaliarsuaq 2003-mi kaammattuuteqaannaratik taamatut inassuteqartut, Jørgen Wæver Johansen oqarpoq.

NUSUKA-p siunnersuutaa Nunavumit isumassarsiarineqarpoq. Taakku ukioq 2000-mili nunaqavissunik salliutitsisarneq ingerlappaat. Nunaqavissut suliffiutillit 21 procentit tikillugu akisunerugaluarlutik sulisussarsiuussinermi ajugaasinnaapput.

Siunnersuut Sulisitsisut Peqatigiiffianit GA-mit pisariaqanngitsutut nalilerneqarpoq, demokraatiniillu kinaassusersiortutut taaneqarluni.