NUSUKA kattukkusunngilaq

NUSUKA-mi suliassaqangaramik kattuffinnik allanik kattuteqateqarnissaq takorlooruminaatsittorujussuugaat, siulittaasoq Gerth Lynge oqarpoq.

- Siullermik eqqaalaarsinnaavara siusinnerusukkut ILIK kattussinnaanermik oqaloqatigisarnikuugatsigu, kisianni alloriaqqinnata. Eqqartulaarnikuuarput kattussinnaaneq, Gerth Lynge oqarpoq.

Isumaqarpoq kattuffiit kattuttut saaffiginnissutaat ima akisinnaallugu:

- NUSUKA-p GA-llu immikkuullarissutai ersertaramik taamaattumik peqqinnartuussaaq sulisitsisut kattuffii marluuginnarunik, oqarpoq.

NUSUKA-p aallartikkamili anguniakkani suli ingerlappai ingerlattuaannarniarlugillu.

Aperaarput nikingassutit suunersut, imalu akivoq:

NUSUKA-p aallartinneranut tunngaviuvoq suliffeqarfiit kattuffinnut sunulluunniit attuumassuteqanngitsut kattuffiliuutissallugit, taakkulu ataatsimoorlutik oqariartorfissaannik pilersitsissallutik.

- NUSUKA-p erseqqilluinnartumik suliniutigisarpaa nunatsinni suliffeqarfiit pigineqartut suliani agguaasarnerni assigiinngitsunilu ineriartornissami tunulliutinneqannginnissaat. NUSUKA oqariartorfiuvoq aammalu piffissami aggersumi suliassanik annertoorpassuarnik suli ulikkaarluni, Gerth Lynge nassuiaavoq.

Taamaattumik Nunaqavissut Suliffiutillit Kattuffiata kattuffiit assigiinngitsunik isummersoqatigiittarnerat peqqinnartutut taarusuppaa.

- Uagut erseqqissumik oqariartuutigisarparput nunatsinni suliffeqarfiit salliutillugit eqqarsartarneq, taamaattumik suliffeqarfiit ataasiinnarmik kattuffeqalissagaluarpata immaqa isummat sinerissaminngaanniit inuiaqatigiit saqqummiussassaat aqqutissaaruttutut ilissapput, siulittaasoq oqarpoq.

- Siulersuisuni eqqartornikuunngikkaluarlugu oqarsinnaavunga NUSUKA ingerlaqqinnissaminut tunngavissaqarpoq. Aatsaat taama ingerlaqqinnissamut tunngavissaqartigilerpoq, taamaattumik kattussinnaaneq takorlooruminaatsittorujussuuara, Gerth Lynge nassuiaavoq.