NUSUKA Islandimiullu inerisaaqatigiinniarput

Kalaallit Nunaata Islandillu niueqatigiinnerat inerisartariaqarpoq. Tamannalu tunngavigalugu nunaqavissut suliffiutillit peqatigiiffiata NUSUKA-p Islandimi sulisitsisut peqatigiiffiat SA-mik taaguuteqartoq suleqatigiinnissamik isumaqatigiissuteqarfigaa.

Taakku taamaaliornermikkut isumaqatigiissut aqqutigalugu niueqatigiinnikkut inerisaasoqarnissaa anguniarniarpaat.

Taamatuttaaq nunat taakku marluk akornanni ilaasortat misilittagaat aallaavigalugit paarlaasseqatigiittarnikkut ineriartortitsisoqarnissaa siunniunneqarpoq.

Isumaqatigiissutigineqarportaaq Islandimi sulisitsisut peqatigiiffiata misilittagarisimasaa tassa EU-mut nunanullu allanut niueqateqartarneq NUSUKA-miit iluaqutiginiarneqarumaartoq.

- Niueqatigiinnerup iluani taamaalilluta pingaarutilimmik alloriassaagut, nunallu taakku marluk imminnut qaninnerulissapput, NUSUKA-p pisortaa Ole Aggo Markussen oqarpoq.

Taanna nangilluni allappoq, NUSUKA-p taamatut isumaqatigiissuteqarneratigut Namminiilivinnissamik eqqarsarnerup ornerusaarnera alluinnarlugu toqqaannartumik nunat tamalaat akornanni niueqatigiinnermut pigaluttuarlutik.

- Qilanaarinerpaavarput ataatsimoorluta pilersaarusioqatigiinnitta piviusunngornissaa, tassa misilittakkatsinnik paarlaasseqatigiinnitsigut niueqatigeeriaatsinik nutaanik nassaarsioqatigiinnissarput, taama Ole Aggo Markussen oqarpoq.