NuSuKa: Aningaasarliorneq aningaasanut inatsimmi eqqarsaatigineqarsimanngilaq
- Politikerit maannangaaq iliuuseqanngippata suliffeqarfiit Nunatsinniittut minnerit eqqugaassapput, Gerth B. Lynge oqarpoq.
Naalakkersuisut aningaasanut inatsisip 2009-moortup 675 millioni koruuninik amigartooruteqarfiunnginnissaa anguniarlugu sanaartornerup iluani sipaarniuteqarput, 2009-miit 2012 ilanngullugu ukiumut 70 millioni koruuninik sipaarniarfiussalluni.
Sipaarniuteqarniarnerit taamaattut illuliortiterinernik eqquissapput.
- Suliffeqarfiit angisuut Tasiilameersut kattuffitsinni ilaasortaapput. Ukioq mannaluunniit suliassatik suunersut naluaat. Tuaviortumillu oqaloqatigiittoqarnissaa piumasaraarput. Kommuneqarfik Sermersooq saaffiginikuuarput, Gerth B. Lynge oqarpoq.
Sanaartugassanut Iluarsagassanullu Aningaasaateqarfiup nutarterneqarnissaa NuSuKap suleqataaffigerusukkaa taassuma aamma oqaatigaa.
- Aningaasaqarniarnikkut ajornartoorneq eqqarsaatigalugu pisariaqalerpoq uagut susassaqartuusugut sulisitsisut Namminersornerullutillu Oqartussat ataatsimoorluta eqqartuinissarput. Sanaartorneq qanoq iliornikkut ingerlanneqassanersoq uani eqqarsaatigaara. Sanaartorneq pingaaruteqartuuvoq, aningaasanillu kaaviaartitsisuullunilu. Suliffeqarfiit Nunatsinniittut qitiutillugit ingerlagutta aningaasaqarniarnerup peqqissumik ingerlanissaa toqqammavilissavarput, Nunaqavissut Suliffiutillit Kattuffianni siulittaasoq Gerth B. Lynge oqarpoq.