Nussornissamut qaammat qaangiuppat qinnuteqarsinnaalissaagut

juulip 10-at 2007 15:54

Ilulissat kommunea nutternissamut aningaasaliissutinut qinnuteqaruni inissialiornissaq matutissinnaassavaa, nalunaarusiarli atuuttitsilersussaq aatsaat qaammat ataaseq qaangiuppat atuutilissaaq.

Nalunaarusiaq, qanoq innikkut qanorlu ilinikkut ilaqutariinnut nussortussanut najugaqarfissaannullu atuinissamut qinnuteqarfissaq, tassa suliffissat aallaavigalugit nutsertitsinissat pillugit nalunaarusiaq, attuumassuteqartunut tamanut tusarniassutaaqqammerpoq, tusarniaanermilu siunnersuutit nalilersorneqareerpata qaammatip ataatsip missaa qaangiuppat atuutilersussaq pillugu Suliffeqarnermut Inuutissarsiutinullu Ilinniartitaanermut pisortamut Palle Frederiksenimut apeqqutigaarput ukiumut suliffissat malillugit nuttarnissamut atatillugu inissialiornissamut qassit atorneqassanersut ima oqaatigai:

Kommunet qinnuteqarsinnaapput naalakkersuisunut naalakkersuisullu siunniunnikuuvaat ukiumut 25 million kronet atorneqarsinnaanissaat inissialiornermut nuussimasunut taamatut.

Kisianni taakkua qaavatigut angalanissaannut nuunnissaannut matussutissaqarpoq.

Ja, taakku inatsisartut aningaasaliissutiginikuusaat 3,75 millioniupput ukioq manna.

Tassa ukiut tamaasa ilaqutariit 50-it illoqarfimmut allamut nuunnissaannut aningaasaliisoqarpoq, nutsertoqassappalli illoqarfiit pineqartut akornganni uppernarsarsinnaasussaavoq ilumut suliffissaqartoqarlunilu inissaqartitsisoqarnersoq.

Tassa Ilulissani inissianik sanaartornissamut qinnuteqartoqarsinnaavoq taamaasillunilu sulisussanik tikisitsisoqarluni, ingammik uppernarsarsinnaagaanni ilumut illoqarfimmi sulisussanik amigaateqartoqartoq.

Ilulissani Royal Greenlandip tunisassiorfiani suliassat annikillisarneqarsimagaluartut suli sulisussanik amigaateqartoqarpoq. Tunisassiorfiulli qerititsiviata imaarneqarneranut atatillugu sulisut ilaasa sulinerat sivikinnerusinnaasartoq Tunisassiorfimmiit aamma oqaatigineqarpoq.