Nungusaataanngitsumik raajarniarneq nittarsaakkusunneqarpoq
MSC tassaavoq Marine Stewardship Council, tassaasoq Imaaneersunik maligassiuilluni siunnersuisooqatigiit.
Kalaallit Nunaanni raajanik MSC atorlugu nalunaarsuisinnaanngorsinnaanissaq, siunnersuisooqatigiinni januaarimi naliliiffigineqassaaq.
Raajanik nunatsinniit avammut tuniniaanermi MSC-mik nalunaarsuisalernissaq nunatta pisariaqartikkaa, KNAPK-imi pisortap Alfred Jakobsenip oqaatigaa.
Peqatigiiffik Sustainable Fisheries Greenland, novemberimi ukioq manna pilersinneqarpoq. Siullermik allatut taaguuteqarsimagaluarpoq, anguniagartik allanngortinngikkaluarlugu allamik taaguuteqalerpoq.Anguniarneqartorlu tassaavoq, nunatsinniit raajat avammut tunineqartut puuini MSC-imik nalunaaqqutsersuisalernissaq. Peqatigiiffik ukuninnga ilaasortaaffigineqarpoq: GA, Polar Seafood, Royal Greenland, KNAPK kiisalu kilisaataatillit APS-it allat.
MSC-imik nalunaaqutsikkanik avammut tunisaqartarnissaq sooq pisariaqarami?
- Aalisakkat tunisassiavut MSC-lerneratigut uppernarsassavarput aalisakkat avammut niuqqutigisavut piujuartitsinermik tunngaveqartumik pisarineqarsimasut.
Raajat MSC-imik nalunaarsorneqartalerpata tamanna, raajat akiinut annertuumik iluaqutaassasoq Alfred Jakobsenip aamma ilimagaa.
- Raajat MSC-eqalersinnerisigut, akit aalakkaanerulersissinnaavagut, Alfred Jakobsen oqarpoq.