Nungusaataanngitsumik atuineq sisimiormiut oqallisigaat

Qeqqata Kommuniata, aningaasaateqarfiullu Villum Fond-ip aaqqissuussaat ulluni pingasuni ingerlanneqartussaq atuilluarnissamik siunertalimmik isumasioqatigiititsinissaat ullumi aallarnerneqarpoq.
aggustip 18-at 2012 12:34

Isumasioqatigiinnermi peqataasut 120 missaanniipput.  Qeqqata kommunea-ta borgmesteria Hermann Berthelsen isumasioqatigiittunut oqalugiarpoq.

- Ilisimasaqarluartorpassuit soqutiginartut politikererpassuillu attuumassuteqarsinnaasut katersuutsissinnaasimavagut. Taamatummi katersuutsitsinitsinni Issittumi atuilluarluni inooriaaseqalernissap 2020-mi anguneqarnissaa siunertaralutigu katersuutsitsivugut. Tamannami anguniarutsigu kikkut tamarmik akulerussuuttariaqassavagut. Taamaammat ataasinngorpat katersuutsitsinerput qaangiuppat peqataasut isumassarsianik ulikkaarlutik suliassamut sapiunnatik immersorneqareersimassasut naatsorsuutigaarput, borgmester Herman Berthelsen ammaanersiorluni ilaatigut taamatut oqaaseqarpoq.

Peqataasut 120-iusut akornanni kommunalbestyrelsimi ilaasortat, nunaqarfiit sinniisaat, suliffeqarfiit sinniisaat, Naalakkersuisut sinniisaat, tamatumalu saniatigut ilinniartitaanermut, inunnik isumaginninnermut, teknik-imut avatagiisinullu sullissiviit sinniisaat akuupput, kiisalu suliffeqarfinnik inerisaanermut immikkoortortaqarfiit sinniisaat taamatut katersuutsitsinermi peqataassallutittaaq.

Katersuuttussat ulluni tullinnguuttuni pingasuni oqallissaarutit assigiinngitsut tusarnaartassavaat, assigiinngitsutigullu atuilluarnermik tunngassuteqartunik sammisaqartinneqartassallutik.

Katerisimaarneq ataasinngorpat ualikkut naammassineqarpat suliniut pillugu innuttaasut paasitinniarneqarnissaat tullinnguutissaaq. Ataasinngorpammi unnukkut arfineq marlunut Sisimiuni Kulturip illorsuani Taseralimmi innuttaasut ataatsimiisinneqassapput.