Nunavuup namminersornerunissaa Eva Aariaap anguniarpaa
Eva Aariak, Nunavummi naalakkersuisut siulittaasuat, Nunatsiaq Newsimut allappoq Nunavuup namminersornerminik annertusaanissaanut, Canadami naalakkersuisut isumaqatigiinniarfiginissaannut piffissanngortoq.
Nunavummi nunap ilaa 80 procentit sinnerlugit annertussuseqartoq, maanna Canadami naalagaaffeqatigiit piginnittuuffigisaa, Nunavuup nammineq nakkutigilissagaa, aamma isumalluutit tamaaniittut Nunavuup piginnittuuffigilissagai, Eva Aariaap kissaatigaa.
Suliarlu taanna, aatsitassarsiorfiit, gassi nunap iluaniittoq uulialu pissutigalugit, maanna pingaaruteqalersimavoq, suliffeqarfiillu aatsitassanik ujaasinernut 2011-imi 1,4 milliardi koruuninik aningaasaliiniarmata.
Suliffeqarfiit taakku aatsitassanik, uuliamik gassimilluunniit nunap iluaniittumik nassaarunik milliardit koruunerpassuarnik isaatitsisinnaapput, aningaasallu taakku Nunavummut tuttariaqartut Eva Aariak isumaqarpoq.
Taassuma aamma piumasarivaa, aatsitassarsiortut, aatsitassanillu nassaarpata qalluineranni, Nunavuup nammineq nakkutigissagai.
Tamannalu pisinnaavoq Nunavuup namminersornera annertusarneqarpat.
Eva Aariaap Canadami ministeriuneq Stephen Harper aamma Canadap issittortaanut tunngasunut ministeri John Duncan piumaffigisimavai maanna isumaqatigiinninniarnerit aallartissasut, sulili akineqarsimanani. Canadami naalagaaffeqatigiit isumaqatiginninniartussamik suli toqqaasimanngimmata suliaq ingerlanngilaq. Akilinermi ilanngutassiortorput Marianne Stenbæk taama tusarliussaqarpoq.
