Nunavut nunarpullu suleqatigiinnerulerniarlutik isumaqatigiissuteqarput

Nunatsinni Naalakkersuisut Nunavumilu Naalakkersuisut pisuussutinik uumassusilinnik atuinermi, niuernermi minnerunngitsumillu natsiit amiinik niueqatigiinnissamik suleqatigiinnissamik isumaqatigiissuteqarput.

Suleqatigiinniarnermut isumaqatigiissut pilersinneqarpoq Nunatsinni naalakkersuisut Nunavumi ministeriuneq, Poul Okalek aamma Avatangiisinut ministeri Olayuk Akisuk atorfillillu ullaap tungaa ataatsimeeqatigiinneranni:

Hans Enoksen oqarpoq nunat taakku siunissami suleqatigiilluarnerulernissaat isumaqatigiissutigineqartoq:

Oqaloqatigiinnneq ajunngilluinnartumik ingerlavoq, siunnerfigalugu nunat marluk taakku uumassusilinnik atuinermi niuernermilu suleqatigiilluinnarlutik annertusaanissaq isumaqatigiissutigaarput, Hans Enoksen.

Hans Enoksen oqarpoq atorfilittat suleqatigiiffissaannik pilersitsisoqassasoq, kingornalu politikerit naapeqqinniarlutik isumaqatigiissuteqartut.

Hans Enoksen erseqqissaavoq Canadamit puisit amiinik piseqqusiunnaarneq New Foundland- iminngaanersunuinnaq atuutsinneqartoq maannalu Nunavumiit natsiit amiinik pisiortorsinnaalernissaq anguniarneqassasoq:

-Annertunerpaamik eqqartorpavut puisinniarnermut tunngasut, tassa Nunavumiit puisit amiinik pisiortorneq.

- Taakku uagutsituulli piniartarput, uagutsitut atuipput aammalu natiinnarnik puisinniartarlutik, taamaammat puisit amiinik Nunavumiit pisiortorsinnaalernissaq anguniarniarparput, Hans Enoksen oqarpoq.

Hans Enoksen oqarpoq inuiaat inuit nunap piinik uumassusilinnillu inuuniuteqartuunerisa nunarsuarmioqatitsinnut avammut oqariartuutigineqarnissaa aamma isumaqatigiissutigineqartoq:

- Piniakkanik nerisassanillu atueqatigiinnerput nunarsuarmioqatitsinnut erseqqissarniarparput, tamannalu aammma Nunavumi Naalakkersuisut, ICC nunatsinnilu Naalakkersuisut suleqatigiinnitsigut ingerlanneqassaaq, Hans Enoksen naggasiivoq.

Nunatsinni aammalu Nunavumi Naalakkersuisut aasap 2006-ip ingerlanerani suleqatigiissutissamik atsioqatiinnissartik isumaqatigiissutigaat.