Nunavut: Nanoq nungutaanissamut aarlerinartorsiunngilaq
- Nannut nunaanni najugaqarpugut. Nannut ilisimaarilluarpavut amerlassusaallu ernumanartoqartinngilavut, Nunavummi avatangiisinut ministeri Daniel Shewchuk CBC Newsimut oqarpoq.
Taamatut oqaaseqarneranut pissutaavoq, nannut immikkut isiginiarneqarnerat ingerlaannassanersoq imaluunniit uumasutut allatulli isigineqassanersoq maanna isummerfigineqartussanngormat.
Komitép tamatuminnga suliaqartup nannut immikkut isiginiarneqarnissaat innersuussutiginiaraa paasinarsivoq, tassami silap pissusaata allanngoriartornerata kinguneranik nanoq aarlerinaartorsiortinneqalissamat, naak Canadami nannut ukiuni kingullerni 50-ini amerleriarsimagaluartut.
- Silap pissusaata allanngoriartornerata kinguneranik nunat issittumiittut allanngornerujussuarnik nalaattaqartussaammata nassuerutigaarput, taamaattorli siunissamut siulittuutit siunissami pisussanik ilisimaneqanngitsunik tunngavillit pissutigalugit nannut maannakkut immikkut isiginiarneqarnissaannik eqqarsarneq silatusaarnerunngilaq, Daniel Shewchuk oqarpoq.
