Nunavut: -Nannut nungulinngillat!
Nannut issittumiittut nungulinngillat, silaannaallu allanngoriartornerata kingunerisaanik nannut nungukkumaarnerarlugit massakkut oqassalluni siusippallaaqaaq.
Uumasut nunguttussat akornanni nannut inissisimanerarlugit Amerikamiut politikeeriisa isumaat akerlilerlugu Nunavummi naalakkersuisut taama oqarsimasut nutaarsiassaqartitsiviup CBC Newsip ullumi taama allaaseraa.
USA-mi uumasunik illersuiniaqatigiiffiit kattuffiisa præsident Bush taassumalu naalakkersuisooqatai qanittukkut sakkortuumik kajumissaarpai nannut issittumiittut nungukkiartupiloortut akornanniimmata piujuaannarnissaat qulakkeerniarlugit iliuuseqaqqullugit.
Nunavummi naalakkersuisunit annilaangatigineqarpoq, Nunavummi nannup tammajuitsussarsiatut piniarneqartartup ajoquserneqarnissaa, tassami amerikamiorpassuit dollarerpassuarnik akiliillutik nannunniartinneqartarsimapput.
- Nunatsinni nannut amerlassusaat ajoquteqanngiivipput. Inuit ilisimasakitsut amerlaqaat, uumasut illersuiniaqatigiiffiisa kattuffiisa ilisimasakissuseq inuussutigaat – taamaaliorlutillu naalakkersuisutik aalajangernissaannik pinngitsaalisarpaat Nunavummi innuttaasut sakkortoorujussuarmik eqqorneqartussanngorlugit, CBC Newsimut taama Nunavummi avatangiisinut naalakkersuisoq oqarsimasoq issuarneqarpoq
Nunarsuaq tamakkerlugu issittumi nannut 25.000-t missaanniittut missiliorneqartarpoq, taakku 60 procentii canadap avannaaniipput.
