Nunavut namminersornerulerusuppoq
Nunavumi nammineernerulernissamut atatillugu, innuttaasut utaqqinerusariaqarput.
Canada-mi naalakkersuisut misissuititsisimaneranut atatillugu nalunaarusiaq taama allaaserisaqarpoq.
Utaqqeqqusinermut patsisaatinneqarpoq, Nunavumi ilinniagalinnik amigaateqarneq, aningaasaqarnerlu. Oqartussaassuseqarnerunernik tunniussinissami inuit ilinniarsimasut Nunavumi amigaataapput, aammalu pisuussutinut uumaatsunut atatillugu suliassanik tigusisinnaasunik ilinniartitsinissamut aningaasat amigaatigineqarlutik. Nunavumili premierministeri Paul Okalik isumaqarpoq, nammineernerulernissamut suliniarnissaq isumaqatigiinniarnissarlu tuaviornerpaamik pisariaqartoq.
- Piffissaq pisariaqartikkipput nalunngilarput, Canadamili illoqarfiit allat assigalugit avatangiisitta pisuussutaanut atatillugu oqartussaanerunissatsinnik nangartarneqartariaqanngilagut. Oqartussaanerulernissatsinnut kinguarsaaniarsarinerit nunat aggornerisa ilaattut territoriatut ajuallatsitsiniarneruvoq, Paul Okalik CBC Newsimut oqarpoq. Pisuussutinut uumaatsunut aningaasarsiornermi, soorlu qaarusunni pisuussutinik piiaanerni, Nunavummi innuttaasunik arajutsisitsiniarnerusoq Okalik aamma isumaqarpoq.
