Kalaallit Nunaanni Namminersornerunermut inatsimmut assingusoq Nunavummi ukiut 15-it matuma siorna akuersissutigineqarpoq, tamannalu inuit sapaatip akunnerani uani nalliussivaat. Inuit namminersornerulernerat taamani qulakkeerneqarpoq, inatsit ”Nunavut Land Claims Agreement Act” Inatsisartut akuersissutigimmassuk. Aviisimi Arctic Newsimi taama allaaserinittoqarpoq.
-Namminersulernissaq ukiut 30-t sorsuutigereerlugu namminersulernitsinnut isumaqatigiissut 1993-imi atsioratsigu, isumaqaraluarpunga ajornerpaaq qaangerlugu, suliffeqarfimmi Nunavut Tunngavik-mi siulittaasoq, Paul Kaludjak, oqarpoq.
-Assigiinngitsorpassuartigulli akiuussimaqaagut. Isumaqatigiissummi oqaatsit allassimasut kusanartortaqaqaat, kisianni Canadami oqartussaasut isumaqatigiissut eqquutitikkumaataarsimaqaat, Paul Kaludjak aviisimut Arctic Newsimitut oqarpoq.
Paul Kaludjakip peqatigiiffiata Canadami oqartussaasut 2006-imi eqqartuussivimmut tunniuppai, neriorsuutit eqquutitinneqarsimannginnerat pillugu millliardinik taarsiivigitinnissartik piumasaralugu, suliarlu taanna suli ingerlavoq. Pineqarput inuit ilinniartitaanissaat aamma suliniutinut arlalissuarnut aningaasaliinngippallaarneq, tamakkumi isumaqatigiissummut ilaagaluarmata.