Nunavut avataarsualiarfittut sungiusarfigineqarpoq

Nasap Nunavut avataarsuani ulloriarsuarni naammattoorsinissamut piviusorpaluttumik sungiusarfigaat.
Allattoq Rune Langhoff
juulip 29-at 2010 14:29

Amerikamiut avataarsualiartitsisarfiat Nasa, avataarsualiartitsisarnermut tunngatinneqartaraluarpoq, maannali ilisimatuut avataarsualiarnermik suliaqartut Nunavummukarniarput.

Taakku Nunavummi qeqertamut Tallorutinukarniarput, tassami isumaqaramik avataarsualiartartut ulloriarsuarni allani naammattoorsinnaasaminnik tamaani piusuusaartitsinnaasut.

Qeqertami Tallorutini sapaatip akunnerini pingasuni suliaqassapput, tamaanilu robotit ungasianit aqunneqartartut nunap qaavani aqqutigiuminaatsuni qanoq ingerlasinnaanerat immikkut sammineqassalluni.

- Robotit aqqutissanik isumannaatsunik, qaammataasanit takuneqarsinnaanngitsunik qanoq nassaarniarsinnaanerat, aqqutigiuminaatsunillu ilisarsisinnaanerat misissuiffiginiarparput. Taamaalilluta aqqutissat aqqutigineqarsimanngisaannartut aqqutigisinnaalernissaannut pitsaanerpaamik piareersimaniassagatta, Matt Leonard Houstonimi Nasap avataarsualiartitsarfianeersoq, tusagassiuutinut nalunaarummi taama allappoq.

- Tassami qulliit pitsaanngitsut qaamanikinneratalu aqqutissaq aqqutigiuminaatsoq aqqutigineqarsinnaasutut isikkoqalersissinnaasarmagu, Matt Leonard allappoq.