Nunavup naalakkersuisuisa qarasaasiaminnut inatsisaatsuliorlutik isertut akiliiffigerusunngikkai

Nunavummi naalakkersuisut qullersaqarfiilu qarasaasiaat arfininngornermi novembarip ulluisa aappaanni virusinipput, qarasaasiat ramsomwaremik taaneqartartumik allakkanik atuaasinnaajunnaarsitsisartumik virusilerneqarlutik.

Paasissutissat qarasaasiani nassaassaasut Nunavummi naalakkersuisunit pissarsiarineqaqqinniarneqalerput, suliarlu taanna annertungaatsiarluni.

Nunavummi naalakkersuisut allattoqarfii 2000-it missaannik qarasaasiaateqarput, Nunavuullu sinnerani allattoqarfinni qaraasiat 3000-it missaanniillutik. Qarasaasiat taakku aamma atorneqarsinnaajunnaarsinneqarput.

Qarasaasiat arlaannaalluunniit ajornartorsiutip aaqqinneqannginnerani atorneqassappat paasissutissat annaaneqassapput.

AAMMA ATUARUK Nunavummi naalakkersuisut qarasaasiatigut saassunneqartut

Allagaatit atuarneqarsinnaaleqqinnissaannut akiliisoqaqqaassasoq qarasaasiatigullu iliuuseqarniartoqaraluarpat paasissutissat tamarmik annaaneqarsinnaasut qarasaasiatigut saassussisut qarasaasiaq atorlugu nalunaaruteqarput.

Nunavuulli naalakkersuisuisa siulittaasuata Joe Savikataap oqaatigaa saassussisut akilerneqarnavianngitsut.

Joe Savikataap ajornartorsiutaasoq unissaanngitsumik aaqqiissuteqarfiginiarlugu Nunavut Newsimut oqaatigaa. Qarasaasiatigullu toqqortaatinut backuppit atorlugit allagaatit pissarsiareqqinniarneqaleruttornerarlugit.

Allagaatit inunnut tunngasunik soorlu peqqinnissamut aamma ilaqutariinnermut, inatsisinut aningaasanullu tunngasunik paasissutissartallit pissarsiarineqaqqinnissaat naalakkersuisunit pingaarnerutinneqartut taassuma saniatigut oqaatigaa.