Nunavumut suliartortitsisalissaagut?
Nunavummiunik, Nunavimmiunillu sulisartunik paarlatseqatigiittalersinnaanermut suliniut Nuna Job-imik qulequtserneqarsimasoq Nunavummiunit Nunavimmiunillu soqutigineqaqisoq pillugu nalunaarusiaq Ove Karl Berthelsenip saqqummiutissavaa.
Ove Karl Berthelsenimmi suliniut tamanna pillugu Nunavummi Naalakkersuisoqarfimmiut, Nordjobb, kiisalu nunatsinni inuusuttunut suliniaqatigiiffimmi Sorlak-meersut ataatsimeeqatigisaqattaarsimavai.
Suliniutillumi Nuna Job-ip soqutigineqarnerujussua ingerlaannaq paasinarsivoq. Nunavummili Naalakkersuisoqarfimmiut suliniummut soqutiginnilluaraluaqalutik suliniut nutaaliornerujussuummat sinaakkutilioqqaarlugu politikkikkut eqqartorneqariarluni isummerfigineqarnissaa kissaatigaat.
Sinaakkusiliorniarneralumi imaannaanngitsuuvoq. Nordisk Ministerråd-immi aningaasaliiffigeqataaffigerusunngilaat, asulu nunat avannarlerni inuusuttut sulisartunik paarlatsinermik ingerlatsiffiusartoq aamma aningaasaleeqataarusussimanngitsoq.
Allatullumi ajornarmat suliniut nutaaliaalluinnartup aningaasalerneqarnissaa nunatta Naalakkersuisuisa sinaakkutiliorpaat, 2013-ilu aallarnerfigalugu ukiuni marlunni misiliutaasumik ingerlanneqarnissaa tagginneqarluni.
Suliniullu naapertorlugu kalaallit inuusuttut 15-t Nunavimmiullu inuusuttut 15-nik paarlaallutik suliartortalissapput.
Suliniut aningaasanngorlugu 1,7 millionit koruuninik akeqassangatinneqarpoq, taakkulu nunatta karsiata avataaniit nassaariniarneqarnissaat eqqarsaatigineqarluni.